Ամալյա Մարգարյան

Ժիրայր Սեֆիլյանն ընդդեմ Արմենիա թիվիի դատական նիստի ընթացքում հայցվորի ներկայացուցիչ, փաստաբան Տիգրան Հայրապետյանը դատարան ներկայացրեց հայցադիմումը և նշեց, որ շարունակում է պնդել հայցադիմումի մեջ առկա պահանջը, ըստ որի` Ժիրայր Սեֆիլյանը «Արմենիա» հեռուստաընկերությունից պահանջում է հրապարակավ ներողություն խնդրել ` զրպարտություն և վիրավորանք տարածելու համար:

Հիշեցնենք, որ «Հիմնադիր խորհրդարանի» անդամ, ազատամարտիկ Ժիրայր Սեֆիլյանը քաղաքացիական հայց է ներկայացրել ընդդեմ «Արմենիա» հեռուստաընկերության, մասնավորապես` «Սուր անկյուն» հաղորդաշարի լրագրողներ Նելլի Հարությունյանի և Վահե Ղազարյանի դեմ:

Դատական նիստի ընթացքւմ Տիգրան Հայրապետյանը նշեց, որ Ժիրայր Սեֆիլյանը Արցախյան ազատամարտի մասնակից, հերոս է, մեծ հեղինակություն է վայելում Հայաստանում և Արցախում. «Ճանաչված քաղաքական ընդդիմադիր գործիչ է, վերջին տարիներին  հանդես է գալիս իշխանությունների քննադատությամբ, և նրա գործողություններն ամբողջությամբ ուղղված են սահմանադրական ճանապարհով  հասարակությանը համախմբելով ` իշխանությանը պաշտոնաթող անելուն»:

Հայրապետյանը նշեց, որ իշխանության ներկայացուցիչների կողմից բազմիցս Ժ. Սեֆիլյանի և «Հիմնադիր խորհրդարանի» անդամների նկատմամբ բռնություններ են կատարվել` հիշեցնելով Բերձորի դեպքերը, երբ 2015-ի հունվարի 31-ին ոստիկանական մեքենաներով անհայտ անձինք հարձակվել են ավտոերթի մասնակիցների վրա, ծեծել, կոտրել բոլոր մեքենաները և դրոշները, իսկ հանցագործները չեն պատժվել: Մեկ այլ դեպք, երբ Սեֆիլյանի և նրա չորս համախոհների նկատմամբ գործ է հարուցվել այն բանի համար, որ մինչև նրանց կողմից հանրահավաքներ սկսելը, որը պետք է հանգեցներ իշխանափոխության, հասարակական անկարգություն հորդորող խոսքեր են հնչել կազմակերպիչների կողմից:

Ապրիլյան քառօրյա պատերազմից հետո Սեֆիլյանը հայտարարությամբ է հանդես եկել` նշելով, որ հայկական կողմը կրել է 700 հա տարածքի կորուստ, միայն մի քանի օր անց նախագահը հաստատել է Սեֆիլյանի հայտարարությունը, իսկ մինչ այդ նրան մեղադրել են կեղծ տեղեկատվություն տարածելու մեջ:

Սակայն, այսօրվա դատական նիստի ընթացքում քննվում էր այն, որ «Արմենիա» հեռուստաընկերության «Սուր անկյուն» հաղորդաշարի հունիսի 12-ի հերթական հաղորդման ժամանակ` «Հաղթանակը շատ հայրեր ունի» խորագրով, Ժ. Սեֆիլյանի վերաբերյալ սխալ  տեղեկատվություն է տարածվել: Մասնավորապես` հաղորդումը վարող Վահե Ղազարյանը և հետաքննության հեղինակ Նելլի Հարությունյանը իրականությանը չհամապատասխանող փաստեր են արձանագրել, որոնք արատավորում են Սեֆիլյանի պատիվը, արժանապատվությունը և բարի համբավը: Ներկայացվում է մի դեպք, որտեղ Սեֆիլյանը ռազմի դաշտում թողել է նռնակի պայթյունից ենթադրաբար մահացած զինվորի, իսկ ինքը նստել 2 ձիերից մեկը և հեռացել է: Հաղորդավարը խոսում է նախ «դրական» հրամանատարների մասին, ապա զուգահեռներ անցկացնում Սեֆիլյանի որակների հետ և մի քանի արտահայտություն է անում, օրինակ` «հրամանատար էլ կա, հրամանատար էլ»:

=i

«Նման հաղորդաշարը որևէ խնդիր է բարձրացնում և փորձում լուծում առաջարկել, այս դեպքում որևէ խնդիր չի բարձրացվել, որևէ պրոբլեմ չի լուծվել: Այս դեպքում «Արմենիա» հեռուստաընկերությունը բամբասանքի միջոցով փորձել է ինչ-որ ձևով վարկաբեկել Ժ. Սեֆիլյանի պատիվն ու արժանապատվությունը, որևէ հանցագործություն չի բացահայտել, կոռուպցիոն ռիսկ չի բացահայտվել: Երկար ժամանակ պատրաստվել են, հրավիրել են անձանց»,- դատական նիստի ընթացքում ասաց Տիգրան Հայրապետյանը:

 «Շատ կուզենայի, որ հարգարժան իմ կոլեգան ասեր` ինչպես եղավ, ինչպես պատահեց, որ նախապես բոլորը ծանուցվում են, նախապատրաստվում են, նշում են` ինչ հարցեր պետք է տրվի, ինչի համար են այդ բովանդակության հաղորդում պատրաստում, բոլորը խոսում են ժիրայր Սեֆիլյանի մասին, բայց նրան չեն զանգում, չեն հարցնում:

Եթե ձեզ հետաքրքրում են Սեֆիլյանի հրամանատարական որակները, թե նա ինչպիսի ուղի է անցել, այդ դեպքում ինչո՞ւ չեք կանչել Ժիրայր Սեֆիլյանին և նրան հարցեր չեք ուղղել»,- Ժ. Սեֆիլյանի փաստաբանը հարց ուղղեց «Արմենիա» հեռուստաընկերության ներկայացուցչին:

Իր խոսքի մեջ փաստաբանն ավելացրեց նաև, որ հերքման դիմումին որևէ պատասխան չի տրվել, Ժիրայր Սեֆիլյանի դիրքորոշումը չի հրապարակվել. «Ենթադրենք` ամեն ինչ արվել է բարեխիղճ, բայց պետք է Ժիրայր Սեֆիլյանի դիրքորոշումը ևս հրապարակվեր, ինչու՞ այն երեք զինվորները խոսում են, պատմում են, բայց չի հրապարակվել Սեֆիլյանի տեսակետը, մեզ համար պարզ է` ինչու չի հրապարակվել, բայց կուզենայի ողջամիտ պատասխան ստանալ»:

Հաղորդումը մեկ թողարկումով չի ավարտվել, ինչպես փաստաբանն է նշում հաղորդավարը խոստացել է, որ հաղորդումը «Հատուկ դեպքերի» թողարկման ժամանակ կցուցադրվի ամբողջությամբ: Հաղորդումը հրապարակելուց հետո Ժ. Սեֆիլյանին ձերբակալել են:

Հայրապետյանը նշեց, որ «Արմենիա» հեռուստաընկերություն հրավիրված նախկին զինվորները արդյոք տեղյակ են եղել, որ Սեֆիլյանը ևս վիրավորվել է դեպքերի ժամանակ, եթե այո, ինչու չեն նշել այդ մասին: Փաստաբանը «Արմենիա» հեռուստաընկերության ներկայացուցիչ Հերմինե Հովսեփյանին խնդրեց նաև պատասխանել հետեւյալ հարցին`արդյոք հնարավո՞ր է ծանոթանալ այդ անձանց ամբողջական հարցազրույցներին` հասկանալու, թե ինչ տևողություն ունեն և ինչ են պատմում, և  արդյոք «Արմենիա» հեռուստաընկերությունը չի հանել այն դրվագը, որտեղ նրանք պատմում են Սեֆիլյանի վիրավորվելու մասին:

Հիշեցնենք, որ Ժիրայր Սեֆիլյանը հրաժարվում է ներկայանալ դատարան` դատական նիստերը համարելով թատերական ներկայացումներ:

 Հաջորդ` փետրվարի 17-ին կայանալիք դատական նիստի ընթացքում պաշտպանական կողմը հանդես կգա ելույթով: