Գայանե Սարգսյան

Լոռու մարզպետարանի ներքին աուդիտի բաժինը 2016թ.-ին աուդիտ է իրականացրել մարզային ենթակայության 53 կրթական, 26 առողջապահական ընկերություններում և կազմակերպություններում, ինչպես նաև Լոռու մարզպետարանի աշխատակազմի երեք ստորաբաժանումներում, ուսումնասիրով վերջին երեք տարիների փաստաթղթերը:

Ներքին աուդիտի բաժնի պետ Լյովա Բերոյանի խոսքով՝ իրականացված աուդիտի ընթացքում արձանագրվել են բազմաբնույթ խախտումներ ու թերություններ, որոնց մեծ մասն ընդհանրական են և նույնությամբ կրկնվում են բոլոր կազմակերպություններում:

«Տնօրենների կողմից տրված հրամաններում առանձին դեպքերում բացակայում են իրավական հիմքերը, օրենքներին և կառավարության որոշումներին համապատասխան հոդվածներին հղումները: Առկա են սխալ ձևակերպումներ աշխատողների արձակուրդային հրամաններում, որոշ դեպքերում ժամանակային խախտումներով են վճարվել աշխատողների արձակուրդային գումարները: Գրանցվել են աշխատողների միջին աշխատավարձերի սխալ հաշվարկման դեպքեր, գործուղման գումարների հաշվարկման, վճարման խախտումներ, հրամանագրքերում գույքի դուրս գրման վերաբերյալ հրամանները ներկայացված են առանց գույքի անվանացանկի»,- առավել հաճախ հանդիպող խախտումներն է ներկայացնում բաժնի պետը:

Արձանագրվել են նաև աշխատողների պարգևատրման կարգի խախտումներ: «Պարգևատրման հրամանը կա, բայց չի նշվում, թե կոնկրետ ում ինչքան գումար պետք է տրվի»,- պարզաբանում է  Լ. Բերոյանը:

Աուդիտի ենթարկված մարզային ենթակայության մի շարք հիմնարկություններում ուշացումով են վճարել աշխատողների արձակուրդային գումարները, աշխատանքային պայմանագրերը կազմվել են թերություններով, սխալ են հաշվարկվել ժամանակավոր անաշխատունակության ու մայրության նպաստները:

Ինչպես նախորդ տարիներին, այս տարի ևս մարզի հանրակրթական ու հատուկ դպրոցներում  գրանցվել են աշակերտների ոչ ճիշտ թվի ներկայացման դեպքեր, ինչի հետևանքով դպրոցները պետբյուջեից ավել ֆինանսավորում են ստացել:

2013թ.-ին Ֆինանսների նախարության կողմից մարզի դպրոցներում իրականացված ստուգումներից հետո հայտնաբերվել էին ավել թվով աշակերտ ներկայացնելու բազմաթիվ դեպքեր: Բացահայտումներից հետո Լոռու մարզպետ Արթուր Նալբանդյանի հրահանգով աշակերտների թվային տվյալները հայտնվել են աուդիտի բաժնի ուշադրության կենտրոնում, եւ աուդիտի արդյունքում արձանագրվել է. 2014թ.-ին սխալ է ներկայացվել  45, 2015-ին՝ 77, 2016-ին՝ 18 աշակերտի թվային տվյալ:

Առավել կոպիտ խախտումների համար աուտիդի ենթարկված կազմակերպությունների տնօրենները ենթարկվել են տարաբնույթ տույժերի:  2013թ.-ին ազատվել է աշխատանքից՝ 3, խիստ նկատողություն ստացել՝ 7, նկատողություն՝ 6 տնօրեն: 2014թ.-ին նկատողություն է  ստացել 8, 2016-ին՝ ընդամենը 1 տնօրեն:

Մարզի բուժհաստատություններում մատուցված ամբուլատոր գործիքային բուժծառայությունների համար հաշիվ ապրանքագրեր դուրս գրելու փոխարեն կազմվել են փոխադարձ հաշվարկման ակտեր, խախտումներ են գրանցվել նաև գնումների գործընթացում:

Ընդհանուր առմամբ 2016թ.-ին արձանագրվել է 55.8 մլն դրամի խախտում:

Մարզպետի հանձնարարականով 2017թ.-ին աուդիտի բաժինն ուշադրության կենտրոնում կպահի հատկապես մարզի  բժշկական հաստատությունների վճարովի ծառայությունների համակարգը: Արթուր Նալբանդյանն այս ոլորտում կոռուպցիոն ռիսկեր է տեսնում: