Երկուշաբթի, 24 սեպտեմբերի

Դատավորը մերժեց փոխոստիկանապետ Լևոն Երանոսյանի հարցաքննության միջնորդությունը



Ամալյա Մարգարյան

2015թ. «Էլեկտրիկ Երևան» ակցիայի ընթացքում ոստիկանների բռնություններից տուժած լրագրողների գործով այսօրվա դատական նիստին դատախազը հանդես եկավ մեղադրական ճառով: Վերջինս ամբաստանյալներ Տաճատ Նորատունկյանին, Արթուր  Այվազյանին, Կոստան Բուդաղյանին մեղադրանք առաջադրեց Քրեական օրենսգրքի 164-րդ հոդվածի 2-րդ մասի, իսկ Դավիթ Փերիխանյանին` 164-րդ հոդվածի 1-ին մասով և 185-րդ հոդվածի 1-ին մասով եւ խնդրեց դատարանին պատիժ նշանակել նվազագույն աշխատավարձի հինգհարյուրապատիկի չափով, այսինքն` 500.000 դրամ: Դատախազը որպես մեղմացուցիչ հանգամանք նշեց այն փաստը, որ ամբաստանյալներն իրենց խնամքի տակ ունեն անչափահաս երեխաներ:

Հիշեցնենք, որ ոստիկանության աշխատակիցներ  Տաճատ Նորատունկյանի, Արթուր Այվազյանի, Կոստան Բուդաղյանի և փոխգնդապետ Դավիթ Փերիխանյանի նկատմամբ մեղադրանք է առաջադրվել 2015թ. հունիսի 23-ին Ազատության հրապարակում իրենց պաշտոնական դիրքն օգտագործելով` «Ֆոտոլուր» լրատվական գործակալության ֆոտոլրագրող Հայկ Բադալյանի, «Արմենիա» հեռուստաընկերության լրագրող Խաչատուր Եսայանի, «Ուտոպիանա» ՀԿ-ի լրագրող Աշոտ Բոյաջյանի, «Ազատություն» ռադիոկայանի լրագրող Արթուր Պապյանի մասնագիտական օրինական գործունեությանը խոչընդոտելու համար:

Կենտրոն և Նորք-Մարաշ ընդհանուր իրավասության դատարանում դատավոր Արշակ Վարդանյանի նախագահությամբ նիստի ընթացքում լսվեցին նաև վկաների` «Ազատություն» ռադիոկայանի լրագրող Հովհաննես Մովսիսյանի և «ԳԱԼԱ» հեռուստաընկերության լրագրող Փայլակ Ֆահրադյանի ցուցմունքները: Վկա Հովհ. Մովսիսյանը ներկայացրեց, որ 2015-ի հունիսի 23-ին եղել է Բաղրամյան պողոտայում, կատարել իր լրագրողական պարտականությունները և ականատես եղել ոստիկանների կողմից լրագրողների և քաղաքացիների նկատմամբ բռնություն կիրառելուն:

«Չեմ տեսել` ոնց են ուղիղ եթեր ապահովող սարքն անջատել, բայց տեսանկարահանումն անջատվեց, քաղաքացիներին ոստիկանները սկսեցին բերման ենթարկել, մեզ էլ ասացին` իջեք ներքև: Հետո նկատեցի փոխոստիկանապետ Լ. Երանոսյանին , փորձեցի հարցեր ուղղել, նա ձեռքիցս բռնեց և հայհոյեց, դրանից հետո, երբ իմացավ որտեղից եմ, ասաց` «թող ու գնա»,-ներկայացրեց վկան: Ապա ավելացրեց, որ երբ շրջվել է, տեսել է, որ հետ եկած օպերատորին ևս բռնության են ենթարկել, կոտրել տեսախցիկը, նկատել է նաև, որ «Շանթ» հեռուստաընկերության օպերատորին են բռնության ենթարկում` ստիպում ինչ-որ բան ջնջել տեսախցիկից:

Մյուս վկան` Փայլակ Ֆահրադյանը, նույնպես նշեց, որ քաղաքացիական հագուստով ոստիկանների է տեսել Բաղրամյան պողոտայում, ովքեր բռնություն են կիրառել քաղաքացիների և լրագրողների նկատմամբ, ինքը նույնպես բերման է ենթարկվել:

Երկու վկաներն էլ պնդեցին, որ ամբաստանյալներից ոչ մեկին չեն հիշում, չեն ճանաչում:

Նախորդ դատական նիստի ընթացում «Ուտոպիանա» ՀԿ-ի լրագրող Ա. Բոյաջյանի պաշտպան Դավիթ Գյուրջյանը միջնորդություն էր ներկայացրել դատարան ` հարցաքննության կանչելու  նաև ՀՀ փոխոստիկանապետ Լևոն Երանոսյանին, քանի որ ըստ լրագրողների ցուցմունքների` վերջինս ներկա է եղել «Ազատության» հրապարակում, իսկ տուժող Աշոտ Բոյաջյանը դատարանին հայտնել է, որ Լ. Երանոսյանն է հրաման տվել խլել լրագրողների տեսանկարահանող սարքերը։ 

Դատավոր Արշակ Վարդանյանը փոխգնդապետի դատակոչվելու և հարցաքննվելու միջնորդությունը մերժեց` պատճառաբանելով, թե վերջինս այս գործով չի կարող հարցաքննվել, քանի որ նրան հարցաքննության միջնորդություն ներկայացրած կողմը փոխոստիկանապետին վերագրում է ամբաստանյալների կողմից կատարված հանցագործության կազմակերպումը:

Դատարանը նաև մերժեց կրկնակի դատափորձաքննություն անցկացնելու և «Ուտոպիանա» ՀԿ-ի գույք հանդիսացող ֆոտոխցիկի արժեքը և վնասը եւս մեկ անգամ որոշելու մասին միջնորդությունը:

Հիշեցնենք, որ լրագրողների նկատմամբ բռնություն գործադրած ոստիկաններն ընդունել են իրենց մեղքը, դատարանում նոր ցուցմունքով հանդես չեն եկել և պնդել են իրենց նախաքննական ցուցմունքները:

Հաջորդ դատական նիստի ընթացքում պաշտպանկան կողմը և տուժողները հանդես կգան իրենց ճառերով: Նիստը նշանակվել է փետրվարի 8-ին:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ