ԱԻՆ-ի Լոռու մարզային ստորաբաժանումները գույքի ու տեխնիկայի թարմացման կարիք ունեն
Գայանե Սարգսյան
Որքանո՞վ է Լոռին պատրաստ արտակարգ իրավիճակներին դիմակայմանը
«Լոռու մարզի տարածքում գտնվող 33 ապաստարաններից և 28 հակաճառագայթային թաքստոցներից ոչ մեկը չի համապատասխանում իրեն ներկայացվող տեխնիկական պահանջներին»,- այս մասին տեղեկացրեց Արտակարգ իրավիճակների նախարարության Լոռու մարզային փրկարարական վարչության պետ, փ/ծ գնդապետ Կարեն Հովհաննիսյանը 2016թ.-ի աշխատանքների տարեկան ամփոփման ժամանակ:
Վերջինիս խոսքով հաշվի առնելով վերը նշվածը, անհրաժեշտության դեպքում մարզի բնակչության 83 տոկոսի պատսպարումը պլանավորված է իրականացնել բազմաբնակարան շենքերի, կազմակերպությունների, մասնավոր տների նկուղներույմ, իսկ պաշտպանական կառույցներով չապահովված մնացած 17 տոկոսինը՝ պարզագույն և արագ կառուցվող թաքստոցներում:
Մարզում պակաս է նաև անհրաժեշտ քանակի էլեկտրական շչակների թիվը, որոնք արտակարգ իրավիճակներում օգտագործվում են աղետների ազդարարման նպատակով:Մարզի ամբողջ տարածքում բնակչության ազդարարման նպատակով անհրաժեշտ է 217 էլեկտրական շչակ, սակայն մարզում առկա է 57-ը, որոնցից 16-ն ըստ պաշտոնական տվյալների անսարք է:
«Այսօրվա դրությամբ 107 համայնքներից տեղային ազդարարում հնարավոր է իրականացնել միայն 24-ում»,- զեկուցում է վարչության պետը:
Ոլորտի բացերը այսքանով չեն ավարտվում:Պարզվում է, մարզի քաղաքային համայնքներում հաշվառված 183 հրշեջ հիդրանտներից գործում են 69-ը: Գյուղական համայնքներում դրանք ընդհանրապես բացակայում են: Մարզի տարածքում գտնվող 14 հրշեջ ջրավազաններից էլ գործում է ընդամենը 10-ը:
Կ. Հովհաննիսյանի խոսքով՝ նշված հանգամանքները մանավանդ մարզի հեռավոր գյուղերում դժվարեցնում են հրդեհաշիջման աշխատանքների ապահովումը:
Նախորդ տարեվերջին Լոռու մարզի տարածքում գտնվող թվով 25 բենզալցակայաններում ու գազալցակայաններում կատարված ուսումնասիրության արդյունքում Լոռու մարզի հրդեհային և տեխնիկական անվտանգության տեսչության աշխատակիցներն արձանագրել են. գրեթե բոլոր կայաններում առկա են թերություններ և տեխնիկական անվտանգության կանոնների խախտման դեպքեր:
Չնայած վերը նշվածին, թերությունների վերաբերյալ արձանագրություններ են կազմվել 2 գազալցակայանում ու 6 բենզալցակայանում, որոնց պատասխանատուները ենթարկվել են վարչական պատասխանատվության համապատասխանաբար 200 000 և 150 000 դրամի չափով:
2016թ.-ին Լոռու մարզում գրանցվել է տեխնածին վթարի 3 դեպք, որոնցից երկուսը մահվան ելքով: Նշված երեք դեպքերն էլ գրանցվել են հանքարդյունաբերության ոլորտում:
Չնայած պարբերաբար գրանցվող դժբախտ դեպքերին, մարզում դեռևս քիչ չեն ինչպես գրանցում ունեցող և փորձաքննություն չանցնող, այնպես էլ չգրանցված շահագործվող արտադրական օբյեկտները:
«Խնդիրը վերաբերում է հատկապես լեռնահանքային, նավթամթերքների, հեղուկ և բնական գազի, հաստատուն և շարժական լցավորման կայանների ոլորտներին: Շատերը օգտվելով անպատժելիությունից, հրաժարվում են մտնել օրինական դաշտ և շարունակում են շահագործումը՝ օրենսդրական նորմերը չպահպանելով: Կան նաև դեպքեր, երբ արտադրական վտանգավոր օբյեկտները ստանում են բացասական եզրակացություններ, սակայն շարունակում են շահագործվել, որը հղի է տեխնածին վթարների ռիսկերով»,- նշում է Լոռու և Տավուշի մարզերի փորձաքննության բաժնի պետ Կարեն Բոյաջյանը:
Վերջինս որպես անպատժելիության վառ օրինակ մատնանշում է Վանաձոր-Ալավերդի մայրուղու վրա գործող 30-ից ավելի քարի արտադրամասերը, փաստելով, որ գրանցված և փորձաքննություն անցնող արտադրամասերի թիվը չի գերազանցում 10-ը:
«Մեկը մյուսին նայելով ու տեսնելով, որ մյուսը տարիներ շարունակ, 8-10 տարով չի գրանցվում, փորձաքննություն չի անցնում, ոչ ոք իրեն չի պատժում, հրաժարվում են փորձաքննություն անցնել»,- ասում է բաժնի պետը:
Տարեկան ամփոփմանը ներկա Արտակարգ իրավիճակների նախարարի տեղակալ Դավիթ Կարապետյանը բաժնի պետին առաջարկում է տնտեսվարողների շրջանում ակտիվացնել բացատրական աշխատանքները:
«Մեր կողմից իմացված, չգրանցված արտադրական օբյեկտների 80 տոկոսից ավելը ծանուցվել են օրենքի տառի, հետևանքների ու կանխարգելիչ միջոցառումների մասին , սակայն դա ոչ մի արդյունք չի տվել»,- զեկուցում է Կ. Բոյաջյանը:
Լոռու մարզում գրանցվող երկրաշարժերի մասին տեղեկատվությունը Երևան է հաղորդվում 15 րոպեի ընթացքում: Պատճառը սարքավորումների հին լինելն է:
«Քանի որ մեր սեյսմիկ եռաչափական համակարգը նունիսկ 30-40 տարվա պատմություն ունի, 15 րոպեի ընթացքում հաղորդում ենք: Եթե ունենայինք թվային սարքեր, այդ ժամանակահատվածը կիջներ մինչև 5 րոպեի»,- նշում է սեյսմիկ պաշտպանության Հյուսիսային ծառայության տնօրեն Կարեն Մխիթարյանը, հավելելով, որ մարզի ունեցած միակ թվային սարքը տեղադրված է Ստեփանավանում:
Մեկնաբանել