ՈՒրբաթ, 21 սեպտեմբերի

Եղվարդի քաղաքապետի հողերն անմշակ են մնացել



Եղվարդի քաղաքապետ Նորայր Սարգսյանը մոտ 15 հեկտար գյուղատնտեսական նշանակության հողամասեր ունի, որոնք մնացել են անմշակ:

Թիվ 26 Ընտրատարածքային ընտրական հանձնաժողովը «Հետք»-ին է տրամադրել Եղվարդի քաղաքապետի գույքի եւ եկամուտների հայտարարագիրը, որտեղ Սարգսյանը գրառել է ութ միավոր անշարժ գույգ:

Նորայր Սարգսյանը հայտարարագրել է գյուղատնտեսական նշանակության 5 միավոր հողամաս, որոնց ընդհանուր մակերեսը կազմում է ավելի քան 13,5 հեկտար:

Քաղաքապետը հայտարարագրել է նաեւ գյուղատնտեսական նշանակության արտադրական տարածք՝ 1,25 հեկտար մակերեսով, ինչպես նաեւ երկու առանձնատուն՝ իրենց հողամասերով: Ողջ անշարժ գույքը Սարգսյանին է պատկանում սեփականության եւ համատեղ սեփականության իրավունքով եւ գտնվում է Եղվարդ քաղաքում:

Պատասխանելով «Հետքի» հարցմանը, թե ինչ գործունեություն է ծավալում Եղվարդի քաղաքապետը, ինչ գյուղնշանակության արտադրությամբ է զբավում, Նորայր Սարգսյանը պատասխանել է, որ գործարարությամբ չի զբաղվում, հողամասերը չեն մշակվում, իսկ գյուղատնտեսական նշանակության արտադրամասը անասնագոմ է եւ չի գործում:

Նորայր Սարգսյանը հայտարարագրել է նաեւ 1982 թվականի արտադրության ՄՏԶ-82 մակնիշի տրակտոր: Եղվարդի քաղաքապետի 10 ամսվա աշխատավարձը կազմել է 4 միլիոն 823 հազար դրամ:

Նորայր Սարգսյանը մասնագիտությամբ մեխանիկ-մեքենաշինարար է, աշխատել է տեխնիկ, փականագործ, ավագ ինժեներ, եղել կրտսեր գիտաշխատող: 1992-1997 թվականներին եղել է Եղվարդի գյուղխորհրդի նախագահի տեղակալը, այնուհետեւ՝ Եղվարդի քաղաքապետի տեղակալը:

1999 թվականից Եղվարդի քաղաքապետն է:

Լուսանկարը՝ Կոտայքի մարզպետարանի կայքի: Լուսանկարում ձախից առաջինը Եղվարդի քաղաքապետն է


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ