Մեկնարկեց ԱԺ նստաշրջանը. Զարուհի Փոստանջյանը Կարո Փայլանին Հայաստան հրավիրելու առաջարկ ներկայացրեց
Այսօր մեկնարկել է Ազգային Ժողովի հինգերորդ գումարման տասնմեկերորդ նստաշրջանը: Առաջին նիստին գրանցվել էր 104 պատգամավոր: ԱԺ առաջիկա քառօրյա նիստերի օրակարգի որոշման նախագծում ընդգրկվել է 136 հարց, 32 միջազգային պայմանագիր:
Օրակարգը ներկայացրեց ԱԺ նախագահ Գալուստ Սահակյանը: Այնուհետև նրան հարց ուղղեց պատգամավոր Զարուհի Փոստանջյանը: Նա, դիմելով Գալուստ Սահակյանին, ասաց, որ կարծում է՝ ԱԺ նախագահը պետք է հրավիրի Թուրքիայի խորհրդարանի հայազգի պատգամավոր Կարո Փայլանին, որպեսզի վերջինս ուղերձով հանդես գա մեր խորհրդարանում և այդ ուղերձը հասցնի մեր բոլոր հայրենակիցներին:
Զարուհի Փոստանջյանը նշեց, որ Կարո Փայլանն այդ ուղերձը հղում է Թուրքիայի խորհրդարանից, ինչի հետևանքով ճնշումների է ենթարկվում, ուստի հայ պատգամավորները պետք է իրենց համերաշխությունը հայտնեն նրան որպես գործընկեր:
«Այդ պաշտոնական հրավերը, կարծում եմ, հենց դուք պետք է անեք: Ես կխնդրեի պարզաբանեք, դուք պատրաստվու՞մ եք նման պաշտոնական հրավերով մեր գործընկերոջը, մեր հայրենակցին հրավիրել Հայաստան, հայոց խորհրդարան»,-ասաց Զարուհի Փոստանջյանը:
Գալուստ Սահակյանը պատասխանեց, որ հարցը պետք է քննարկվի և վերլուծվի՝ արդյոք Փայլանի այցը հայաստան «ձեռք տալիս է, թե ոչ», և դրանով մենք ինչ ենք ուզում առաջ քաշել:
«Միտքը շատ լավն է, ընդունելի է բոլորիս կողմից, բայց միևնույն ժամանակ այստեղ քաղաքական խնդիր կա, պետք է խոսենք նաև այդ մասին»,-հավելեց ԱԺ նախագահը:
Մեկնաբանել