Շաբաթ, 22 սեպտեմբերի

ՀՀԿ խմբակցության պատգամավորները մերժեցին օրակարգ ընդունել բարձրաստիճան պաշտոնյաներին վերաբերող նախագիծը



ԱԺ պատգամավոր Նիկոլ Փաշինյանի կողմից ներկայացված «Բարձրաստիճան պաշտոնատար անձանց և նրանց հետ փոխկապակցված անձանց եկամուտների ձևավորման աղբյուրները և գույքային վիճակն ուսումնասիրող ԱԺ ժամանակավոր հանձնաժողով ստեղծելու մասին» ԱԺ որոշման նախագիծը չընդգրկվեց ԱԺ օրակարգ: Պատգամավորները 39 կողմ, 56 դեմ և 1 ձեռնպահ ձայներով մերժեցին այն:

Մինչ քվեարկությունը, ԲՀԿ խմբակցության պատգամավոր Նաիրա Զոհրաբյանը նշեց, որ Բարգավաճ Հայաստան խմբակցությունը կողմ է քվեարկելու նախագծին: Նրա խոսքով՝ 25 տարի շարունակ այս ամբիոնից, բոլոր ամբիոններից, հրապարակներից խոսվում է, որ երկրը թալանել են, քանի միլիարդ են հանել դուրս, ինչ են արել:

«Հիմա ի՞նչն է խանգարում, ի՞նչն է կաշկանդում, որ եթե տարբեր բարձրաստիճան պաշտոնյաներ՝ նախկին, ներկա, ում անունը շոշափվում է տոտալ թալանի և գանձագողության մեջ, հիմա այստեղ տանք մեր համաձայնությունը՝ ստեղծվի հանձնաժողով առանց վհուկների որսի, կախաղանների, ջրահերձման և այլ մեթոդների պարզել ճշմարտությունը»,-նշեց Նաիրա Զոհրաբյանը:

ՀԱԿ խմբակցությունից Լևոն Զուրաբյանը ևս կողմ արտահայտվեց և ասաց, որ պատրաստ են անցնել այդ «թեստը»՝ նկատի ունենալով առաջին նախագահ Լևոն Տեր-Պետրոսյանի ղեկավարած տարիները:

Կողմ արտահայտվեց նաև Հրանտ Բագրատյանը: Իսկ ՀՅԴ խմբակցությունից Աղվան Վարդանյանը նշեց, որ իրենց խմբակցությունն ունի կայուն սկզբունք, գործընկերների բոլոր այն նախագծերը, որ գալիս են Ազգային ժողով կողմ են քվեարկում, որպեսզի քննարկման, տեսակետների բախման հնարավորություն ստեղծվի: Ըստ Աղվան Վարդանյանի, բացառություն են կազմում այն նախագծերը, որոնք ունենք ակնհայտ պոպուլիստական, անիրագործելի իմաստ: Աղվան Վարդանյանը նշեց, որ խմբակցությունը կողմ է քվեարկելու:

ՕԵԿ խմբակցությունից պատգամավոր Մհեր Շահգելդյանը ևս կողմ արտահայտվեց հանձնաժողովի ձևավորմանը: Իսկ ՀՀԿ խմբակցության ղեկավար Վահրամ Բաղդասարյանը նշեց, որ այս գումարման Ազգային ժողովին մնացել է մի քանի ամիս և իրենք դեմ են ձևականություններին, ուստի հայտարարեց, որ խմբակցությունը դեմ է քվեարկելու:

Նախագծի հեղինակ Նիկոլ Փաշինյանը նշեց, որ ԱԺ որոշումները չեն սահմանափակվում միայն տվյալ գումարման Ազգային ժողովի լիազորություններով, ուստի տեղին չէ ժամկետի ավարտը շահարկելը:

Հիշեցնենք, որ առաջարկվող նախագծով՝ ժամանակավոր հանձնաժողովը պետք է ուսումնասիրեր բարձրաստիճան պաշտոնատար անձանց և նրանց հետ փոխկապակցված անձանց գույքի և եկամուտների ձևավորման աղբյուրները, ինչպես նաև նրանց գույքային վիճակը, դրամական միջոցների և գույքի աղբյուրների օրինականությունը, նրանց դրամական միջոցների և գույքի ձևավորման հետ կապված հնարավոր կոռուպցիոն երևույթները:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ