Երեքշաբթի, 25 սեպտեմբերի

44 միլիոն եվրոյի վարկային համաձայնագիր է ներկայացվել Ազգային ժողով



Ազգային ժողովում այսօր քննարկվում է Հայաստանի հանրապետության և Ասիական զարգացման բանկի միջև 2016թ. նոյեմբերի 9-ին ստորագրված «Հայաստան-Վրաստան սահմանային տարածաշրջանային ճանապարհի (Մ6 Վանաձոր-Բագրատաշեն) բարելավման ծրագիր» (ընթացիկ գործառնություններ) վարկային համաձայնագիրը, որը ներկայացրել է հանրապետության նախագահը:

Հիմնական զեկուցող, տրանսպորտի, կապի և տեղեկատվական տեխնոլոգիաների նախարարի առաջին տեղակալ Արթուր Առաքելյանը, ներկայացնելով համաձայնագիրը, ասաց, որ դրանով նպատակ է դրվել բարելավել Ալավերդի-Վանաձոր-Վրաստանի սահման միջպետական նշանակության ճանապարհը:

Ծրագիրը բաղկացած է երկու մասից և ֆինանսավորվելու է երկու վարկային համաձայնագրով: Մեկն արդեն վավերացվել է Ազգային ժողովի կողմից դեռևս 2016թ-ին և իրագործման փուլում է գտնվում: Դրանով վերանորոգվելու է Վանաձոր քաղաքի սկզբնամասից մինչև 38կմ ճանապարհահատվածը: Իսկ մյուսով, որն այժմ քննարկվում է խորհրդարանում, վերանորոգվելու է 38կմ-ից մինչև Բագրատաշենի անցակետի ճանապարհահատվածը:

Փոխնախարարի խոսքով՝ ճանապարհն ամբողջությամբ հիմնանորոգվելու է և լինելու է շատ անվտանգ և հարմարավետ:

Ծրագրի շրջանակում հիմնովին վերանորոգվելու են ճանապարհի վրա գտնվող թվով 3 թունելները, որոնք Ա. Առաքելյանի խոսքով՝ չէին համապատասխանում ստանդարտներին: Ամբողջովին կհիմնանորոգվի 12 կամուրջ, իսկ ճանապարհի արագությունը կավելանա 2,5 անգամ:

Ճանապարհը հարակից է Լոռու և Տավուշի մարզերի 30 համայնքների, անցնում է հուշակոթողների կողքով և կառավարության ներկայացուցչի ասելով՝ զբոսաշրջային նշանակություն ևս ունի:

Զեկուցողը նշեց, որ վարկային համաձայնագրով պարտավորության չափը 44 միլիոն եվրո է: Ֆինանսների նախարարության կողմից ընտրվել է լողացող տոկոսադրույքը, որը շուրջ 1% է կազմում: Կստեղծվի շուրջ 500 աշխատատեղ:

Նախատեսում են ծրագիրն ավարտել 2018-2019 թվականներին:

ՀԱԿ խմբակցության պատգամավոր Արամ Մանուկյանը զեկուցողից հետաքրքրվեց` այդ 44 միլիոն եվրոն ավելանում է 5,9 միլիարդ դոլար վարկային պարտավորություններին, թե արդեն եղած պարտավորությունների մեջ է մտնում: Արամ Մանուկյանը նաև հետաքրքրվեց, թե ընդհանուր վարկային պարտավորության մեջ որքան են կազմում տրանսպորտային ուղղվածության վարկերը:

Պատասխանելով հարցին` փոխնախարարը նշեց, որ վարկային միջոցներ սպառող հիմնական գերատեսչություններից են, սակայն կոնկրետ վիճակագրություն չի կարող նշել: Արթուր Առաքելյանը չնշեց, թե արդյոք 44 միլիոն եվրոյի վարկային համաձայնագիրը ներառված է արդեն առկա վարկային պարտավորությունների մեջ, թե նոր է ավելանալու: Նա նշեց, թե պատրաստ չէ, լրացուցիչ կտեղեկացնի:

«Ախր այդ պարզ հարցը, որ ասում եք կտեղեկացնեմ: Այսինքն մինչև հիմա չգիտեք այդ 40 միլիոնը մեր պետական պարտքի վրա ավելանում է, թե ներառված է: Գիտեմ, դժվար է պատասխանել՝ ավելանում է, որովհետև գիտեք դրա արձագանքն ինչն է լինելու: Բոլոր նախարարությունները՝ ձեր խնդիրները լուծելու համար վերցնում եք ձեր սիրուն ծրագրերը, իսկ պետության պարտքնն արդեն անցել է ՀՆԱ-ի 50%-ը, բյուջեի չգիտեմ քանի տոկոսը, իսկ 6 միլիարդը մուծելու են մնացած բոլորը, բացի նրանք, ովքեր վերցրել են: Սրա համար եմ հարցնում և գիտեմ ինչու եք դժվարանում պատասխանել», - ասաց Արամ Մանուկյանը:

Պատգամավորը նշեց, որ շուրջ 6 միլիարդ դոլար կազմող պետական պարտքն արդեն կարմիր գիծն անցած թիվ է:

Արթուր Առաքելյանը հաստատեց, որ այո, այս համաձայնագրով պարտքն ավելանում է: Սակայն նշեց, որ իր գերատեսչությունը չի զբաղվում վիճակագրությամբ, այդ իսկ պատճառով չի նշել, որպեսզի չսխալվի:


Գլխավոր էջ

Տպել    |  In English



Մեկնաբանություններ (1)
1. Վալյա20:02 - 28 փետրվարի, 2017
Էդ դատարկ դահլիճում ով էր վարկային պայմանագրով զբաղվում?Ձրիակերներ..միայն փող են ստանում..
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ