Դատարանը մերժեց «Սասնա ծռեր» խմբի անդամ Արամ Հակոբյանի խափանման միջոցը փոխելու միջնորդությունը
Ամալյա Մարգարյան
Այսօր Արաբկիր և Քանաքեռ-Զեյթուն ընդհանուր իրավասության դատարանը նիստը նախագահող դատավոր Մարինե Մելքոնյանի գլխավորությամբ, մերժել է «Սասնա Ծռեր» խմբի անդամ Արամ Հակոբյանի նկատմամբ ընտրված խափանման միջոցը՝ կալանավորումը փոխարինել գրավով: Այս մասին հայտնում է Արամ Հակոբյանի պաշտպան փաստաբան Դավիթ Գյուրջյանը:
Նա մարտի 22-ին հայտարություն էր տարածել և նշել, որ նույն օրը նշանակված՝ կալանքի ժամկետը երկարացնելու մասին միջնորդության քննության նիստին դատարանին են ներկայացրել Արամ Հակոբյանի բժշկական փաստաթղթերի փաթեթը: Փաստաբանը հայտնել էր, որ իր պաշտապանյալի նկատմամբ ՔԿՀ-ում պատշաճ բուժօգնություն և հետազոտություններ չեն իրականացվել: «Նրա առողջական վիճակի վերաբերյալ լիարժեք տեղեկություններ չկան, ինչը լուրջ ռիսկ է ներկայացնում Արամ Հակոբյանի կյանքի համար»,-հայտնել էր փաստաբանը:
Փաստաբանը նաև հայտնել էր, որ իր պաշտպանյալի առողջական վիճակը փետրվար ամսին վատացել է` ուղեղի կաթվածի նախանշաններ են առաջ եկել, և նրան տեղափոխել են «Սուրբ Գրիգոր Լուսավորիչ» ԲԿ, հետո՝ «Դատապարտյալների հիվանդանոց», իսկ «Երևան-Կենտրոն» ՔԿՀ-ում ստացել է ներերակային ներարկումների 2 շաբաթվա կուրս, սակայն Արամ Հակոբյանի շարժողական և խոսակցական ֆունկցիաները չեն վերականգնվել:
Դավիթ Գյուրջյանը հայտարարության մեջ նշել էր նաև, որ «Ապրիլի 24-ի» գործով հիշյալ առողջական խնդիրների մի մասի վկայակոչման արդյունքում Արամ Հակոբյանի նկատմամբ գրավ էր կիրառել և ավելացրել, որ պատրաստվում են դիմել Մարդու իրավունքերի եվրոպական դատարան:
Հիշեցնենք՝ Արամ Հակոբյանը մեղադրվում է Քր.օր 218 հոդվածի 3-րդ մասի 1-ին կետով, այն է՝ կազմակերպված խմբի կողմից պատանդ վերցնելը, 235 հոդվածի 3-րդ մասով՝ կազմակերպված խմբի կողմից՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը։
Մեկնաբանել