Շտապօգնության նոր մեքենաներ՝ մարզերի բուժհաստատություններին
Առողջապահության նախարարության կողմից վերջերս ձեռք են բերվել շտապ բուժօգնության մեքենաներ (ՈՒԱԶ-39623-A կարգի)՝ նախատեսված են լեռնային բնակավայրերի համար: Նախարար Լևոն Ալթունյանի հրամանով ստեղծված հանձնաժողովը Հայաստան ներկրված այդ մեքենաներն արդեն սեփականության իրավունքով հանձնել է Մեղրու տարածաշրջանային, Բերդի, Սիսիանի, Վարդենիսի, Մարտունու, Վայքի, Վանաձորի և Ախուրյանի բժշկական կենտրոններին։ Վանաձորի և Ախուրյանի բկ-ներին հատկացվել է 2-ական մեքենա։ Այս մասին տեղեկացնում է ԱՆ մամուլի ծառայությունը:
Շտապօգնության մեքենաներն ունեն բարձր անցանելիություն և միաժամանակ հագեցված են շտապ և անհետաձգելի բժշկական օգնության ծառայության համար նախատեսված ժամանակակից սարքավորումներով ու պարագաներով, այդ թվում` շարժական արհեստական շնչառության սարքավորում և դեֆիբրիլյատոր։ Դա հնարավորության կտա ինչպես տանը, այնպես էլ` հիվանդի տեղափոխման ընթացքում, ցուցաբերել անհետաձգելի բժշկական օգնություն:
Նշված բոլոր կենտրոններին կից գործող շտապօգնության կայաններն այսուհետև կկարողանան շրջակա բազմաթիվ բնակավայրերից ստացվող կանչերին ավելի արագ արձագանքել և տրամադրել արդյունավետ բուժօգնություն։
Մեկնաբանել