Շիրակի մարզի Գյումրիից 45 կմ հեռավորության վրա գնտնվող Արփի խոշորացված համայնքի Բերդաշեն բնակավայրում գտնվող 30/30 ընտրատեղամասում 11:00-ի դրությամբ ընտրություններին մասնակցել է 40 ընտրող: Տեղամասային ընտրական հանձնաժողովի նախագահ Կարեն Ախցխեցյանի փոխանցմամբ ընտրացուցակով ընտրողների թիվը Բերդաշենում 274-ն է, որից 12-ը ներկայացաված են լրացուցիչ ցուցակներով:

«Լրացուցիչ ցուցակներում հիմնականում ընդգրկվել են հանձնաժողովի անդամներ, որ չէին կարող իրենց ընտրատեղամասերում քվեարկել, ոստիկան եւ Բերդաշենում փաստացի բնակվողներ, ովքեր հաշվառված են այլ վայրում: Կոնկրետ այլ վայրում հաշվառված, բայց բերդաշենում քվեարկողները 7-ն են»,-նշեց հանձնաժողովի նախագահը:

Բերդաշենում ընտրատեղամասը կահավորված է 2015թ-ին հրդեհված միջնակարգ դպրոցի մի փոքրիկ սենյակում: Ընտրատեղամասում բացակայում է տեսախցիկը՝ չեն հատկացրել, հանձնաժողովին չեն տրամադրել նաեւ խոշորացույց վատ տեսնող, ակնոցները մշտապես մոռացող քվեարկողների համար: Մինչեւ այս պահը բերդաշենցի ընտրողներից առայժմ 3-ն են քվեարկել այլ անձանց օգնությամբ, մեկ ընտրող էլ մատնահետքի նույնականացման հետ կապված է խնդիր ունեցել:

Բերդաշենում տեղակայված 30/30 ընտրատեղամասում դիտորդական առաքելությամբ այցելել են ԵԱՀԿ երկու դիտորդ՝ Միա Հելենան եւ Բոգդան Բիրիսը: Բացի «Հետք»-ից, քվեարկության պահից մինչեւ ժամը 11:00-ը, որեւէ այլ լրատվամիջոցից Բերդաշեն չեն այցելել: Ինչ վերաբերում է տեղացի դիտորդներին, ապա քվեարկության ընթացքին հետեւում է բերդաշենցի 50-ամյա Հարություն Չափանյանը  «Աբովյանի ուսանողական խորհուրդ»-ից, եւս մեկ դիտորդ Բերդաշեն գյուղից Տարոն Ախցխեցյանը «Լիարժեք կյանք» հկ-ից, 4 վստահված անձինք ՀՀԿ-ից, ՀՎԿ-ից, «Ծառուկյան» դաշինքից եւ ՀԿԿ-ից: Թե Չափանյանը, թե Տարոն Ախցխեցյանը տեղեկացված չէին, թե ինչ կազմակերպություն են իրենք ներկայացնում: