HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Հերգնյան

Նախարարը՝ բջջային օպերատորներ-OTT խաղացողներ պայքարին միջամտելու մասին

Այս տարվա հունվար-փետրվարին Հայաստանում կապի ոլորտի ընդհանուր հասույթը կազմել է 21.9 մլրդ դրամ։ Ոլորտում հասույթի անկումը, որը սկսվել է դեռևս 2014 թվականից, շարունակվում է։ 2016 թվականի հունվար-փետրվարի համեմատ՝ այս տարվա համապատասխան ժամանակահատվածում անկումը կազմել է 6.5%։ Այս մասին  են վկայում Հայաստանի ազգային վիճակագրական ծառայության տվյալները (ՀՀ ԱՎԾ):

Հայաստանյան կապի ոլորտում առյուծի բաժինը զբաղեցնում է հեռահաղորդակցությունը։ Նշված 21.9 մլրդ դրամից 20.8 մլրդ դրամն ապահովել է այս ենթաոլորտը,  որի հասույթի կրճատմամբ էլ պայմանավորված է կապի ոլորտի ընդհանուր ցուցանիշի նվազումը։ Այս տարվա առաջին երկու ամիսներին հեռահաղորդակցության հասույթը կրճատվել է 7.2%-ով։

Կապի ոլորտում 770 մլն դրամի շրջանառություն է ապահովել հեռուստածրագրերի կազմման և հեռարձակման ոլորտը, մոտ 320 մլն դրամ էլ՝ ռադիոծրագրերի կազմման և հեռարձակման  ոլորտը։ Առաջինի դեպքում գրանցվել է  հասույթի 5.3% աճ, երկրորդի դեպքում՝ 10.2%, բայցի քանի որ նրանց կշիռը անհամեմատ փոքր է կապի ոլորտում, գրանցված աճերը էական ազդեցություն չեն ունեցել ոլորտի ընդհանուր հասույթի վրա։

Չնայած ներկայացված են ընդամենը երկու ամսիների ցուցանիշները, սակայն պատկերը նույնն է նաև տարեկան կտրվածքով. վերջին տարիներին հեռահաղորդակցության ոլորտում շրջանառությունը կրճատվում է։ Այս ոլորտն էլ իր հերթին բաժանվում է ենթաոլորտների, որոնց կազմում ամենամեծ կշիռն ունի բջջային կապը, ավելի կոնկրետ՝ բջջային հեռախոսակապը։ Եվ, ինչպես գրել ենք նախկինում, բջջային կապի հասույթի անկումը պայմանավորված է աշխարհում OTT (անգլ. Over the Top) ծառայությունների լայն տարածմամբ։ Անմասն չէ նաև Հայաստանը։ OTT-ների ամենահայտնի օրինակներից են Skype-ը, Viber-ը, Messenger-ը, WhatsApp-ը և այլն։ Մարդիկ գնալով ավելի շատ են օգտվում այս ծառայություններից և ավելի քիչ՝ բջջային հեռախոսակապից։  

Հայաստանում գործող երեք բջջային օպերատորները հավաստիացնում են, որ «Ղ-Տելեկոմ»-ը (VivaCell-MTS), «ԱրմենՏել»-ն (Beeline) ու «Յուքոմ»-ը (Ucom)  OTT խաղացողների դեմ պայքարելու իրենց ծրագրերն ունեն։ Հաճախ քննարկվում է նաև՝ արդյոք պետությունը պե՞տք է միջամտի այս հարցին, թե՞ ոչ։ Կան տեսակետներ, որ պետության միջամտությունը հարկավոր է բացառել, բայց կան նաև հակառակ տեսակետներ՝ պետությունը պետք է սահմանափակումներ կիրառի OTT ծառայությունների տարածման հարցում։

Տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանն օրեր առաջ «Հետք»-ի հետ զրույցում անդրադարձել է այս հարցին։ «Այս խնդիրը միայն Հայաստանում չէ։ Այն ամբողջ աշխարհում է։ Մենք խոսում ենք և ՏՏ ոլորտի զարգացումից, և միաժամանակ՝ բջջային կապի հասույթի մասին։ OTT ծառայությունները հենց ՏՏ ծառայություններ են։ Մեկը մյուսին (ՏՏ ծառայությունները՝ բջջային կապին-հեղ.) փոխարինելով՝ կապի հասույթը կարող է մեծանալ»,- նշեց նախարարը։

Հարցին, թե որքանով է դա ներկայում իրատեսական, եթե հաշվի ենք առնում, որ հայաստանյան հեռահաղորդակցության ոլորտի շրջանառության առյուծի բաժինը ներկայում ապահովում է բջջային շուկան, իսկ ինտերնետի դերը փոքր է, Վ. Մարտիրոսյանը պատասխանեց. «Ինտերնետի բաժնը փոքր է, բայց պոտենցիալը մեծ է»։

Անդարդառնալով տեսակետներին, որ պետությունը պետք է միջամտի այս հարցում և սահմանափակի OTT ծառայությունների տարածումը, նախարարը նշեց, որ դեմ է այդ մոտեցմանը. «Դեմ եմ, քանի որ պետք չէ խոչընդոտել տեխնոլոգիական զարգացմանը։ Այս թեման քննարկել ենք բջջային օպերատոների հետ, հանդիպել ենք։ Իրենցից էլ կարծիքներ կան, որ կարելի է սահմանափակել, ուրիշներն էլ կողմ են, որ թողնենք զարգանան»։

Լուսանկարը՝ ՀՀ տրանսպորտի, կապի և տեղեկատվական տեխնոլոգիաների նախարարության կայքից

Մեկնաբանություններ (1)

Արմեն
Մեկնաբանությունը... ինչպե՞ս կարող է հհկ-ն թույլ տա ինչ որ մի ծառայությունից ժողովուրդն անվճար օգտվի, այն էլ իր շահույթի հաշվին...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter