HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Նաիրա Հայրապետյան

Սերժ Թանկյան. Իմ ձայնն ու գրիչը արդարության համար են պայքարում

Աշխարհահռչակ ռոք երաժիշտ Սերժ Թանկյանն օրերս կրկին Հայաստանում էր: Կանադահայ կինոռեժիսոր Ատոմ Էգոյանի, դերասանուհի Արսինե Խանջյանի և սցենարիստ Էրիկ Նազարյանի հետ նրանք խորհրդարանական ընտրություններին հետևող դիտորդական խմբում էին: Ապրիլի 3-ին նրանք եռօրյա այցով Արցախ ժամանեցին մեկ այլ առաքելությամբ` հանդիպելու երիտասարդ արվեստագետների հետ, ծանոթանալու Արցախի կյանքին, սահմանային գոտիներում տարվող աշխատանքներին, լսել ժողովրդին ու պարզապես շփվել նրանց հետ: Այցը կազմակերպել էր «Թուֆենկյան» բարեգործական հիմնադրամը:

Պաշտոնական հանդիպումներից բացի, Թանկյանը խմբի հետ այցելեց զորամասեր, հանդիպեց և զրուցեց զինվորների հետ, երիտասարդ արվեստագետների, լսեց նրանց՝ փորձելով համագործակցելու և տաղանդավոր երիտասարդներին աջակցելու ճանապարհներ գտնել: Սա Թանկյանի երկրորդ այցն էր Արցախ, առաջին անգամ այստեղ եղել էր 2001 թվականին:

Թեև այս այցելության հանդիպումների գրաֆիկը խիտ էր և գեհագեցած, Սերժ Թանկյանը ժամանակ տրամադրեց՝ «Հետք»-ի հետ զրուցելու երաժշտության, իր ներկա և նախատեսված ծրագրերի, ինչպես նաև մտահոգությունների մասին: Նա ևս առաջին հերթին կարևորեց երիտասարդների հետ հանդիպումն ու նրանց նեցուկ լինելու անհրաժեշտությունը: «Թեև հոգնած էի շատ, բայց ուզում էի ավելի երկար մնալ և զրուցել երիտասարդների հետ, քանի որ շատ ոգևորված էի այդ հանդիպմամբ: Շատ կարևոր է, որ երկրի երիտասարդությունն զգա, որ իր տաղանդը տեսնող և լսող աշխարհն իր հետ է»,- ասաց երաժիշտը:

Հարցին, թե ինչ երաժշտական գործի կամ նախագծի համար է հիմա աշխատում, Սերժը պատասխանում է՝ խոստովանելով, որ վերջերս իրեն ավելի շատ որպես ակտիվիստի են հարցեր ուղղում, քան որպես երաժշտի: «Շնորհակալ եմ այդ հարցի համար, քանի որ վերջին շաբաթվա ընթացքում որևէ մեկը քաղաքականությունից բացի ուրիշ ոչ մի բանի մասին չէր հարցրել:- ասում է երաժիշտը: Մինչդեռ թվարկելու բազմաթիվ ծրագրեր կան երաժշտության ոլորտում: Հիմա աշխատում է հիմնականում կինոերաժշտության ասպարեզում: Ռուսական պատմական մի նոր ֆիլմի համար է երաժշտություն գրում, մինչ այդ աշխատել է «Paradise Lost» դոկումենտալ և արդեն բավական տարածում գտած «Promise» ֆիլմի սաունդթրեքի վրա և այլն:

«Մայիսից հետո սկսելու ենք խմբի նոր համերգային շրջագայության համար աշխատանքները, քանի որ առաջիկայում նախատեսված է 21 համերգից բաղկացած նոր ծրագիր եվրոպական տարբեր երկրներում և Մոսկվայում»:  

Սերժ Թանկյանի՝ ներկա և նախատեսված ծրագրերի, նոր գործերի մասին զրույցի ընթացքում, բացահայտվում է նրա մեկ այլ նախասիրության մասին: Պարզվում է, Սերժը պատրաստվում է հերթական նոր էքսպերիմենտի, բայց այս անգամ ոչ թե երաժշտության, այլ՝ սուրճի ասպարեզում:

«Ես մտադրվել եմ զբաղվել հայկական սուրճի արտադրությամբ, որը մոդեռն և շատ տպավորիչ մի բան պիտի լինի՝ հայկական համ ու հոտով: Ես սուրճ շատ եմ սիրում, սուրճի խելագար եմ»,- կատակում է երաժիշտը: «Gavat Coffe» անունով նոր բրենդը նա պատրաստվում է ներկայացնել ԱՄՆ-ում և Եվրոպայում:«Ես երբեք իմ անունը երաժշտությունից բացի այլ բնագավառի համար չեմ ծառայեցրել, բայց այս պարագայում ես ուզում եմ հայկականը տեսանելի դարձնել նաև այս ճանապարհով»,- ասում է Թանկյանը:  

2007թ. «System of A Down» խմբի, այսպես ասած, արձակուրդային դադարից հետո (2006թ.), Թանկյանը թողարկեց իր առաջին սոլո ալբոմը՝«Elect the Dead» անվամբ: Այս շարքի գրեթե բոլոր գործերի համար տեսահոլովակներ նկարահանվեցին: 2009թ. այս ալբոմում ընդգրկված երգերի հիմնական կազմը ներկայացվեց սիմֆոնիկ համադրությամբ, որի համերգային ձայնագրությունը՝ Օկլենդի սիմֆոնիկ նվագախմբի հետ համատեղ կատարմամբ, թողարկվեց մեկ տարի անց՝ «Elect the Dead Symphony» անվամբ: Թանկյանի անհատական գործունեության մեջ առանձնահատուկ է «Orca. Symphony No 1» նախագիծը: Այստեղ ակնհայտորեն երևում է երաժշտի՝ ստեղծագործական այս փուլում դասական երաժշտության մեջ գտնվելու հանգամանքը: Ռոքի և երաժշտական այլ ժանրերի հետ համադրության փորձ Թանկյանն արել էր ավելի վաղ՝ 2003թ. ներկայացված Serart ալբոմում (Արտո Թունջբոյաջյանի հետ): Հետագայում պրոգրեսիվ երաժշտության նոր զարգացումներն արդեն նրան տեղափոխում են ջազի աշխարհ՝ ծնունդ տալով նոր՝ «Jazz-Iz-Christ» երկխոսությանը:

«Ես որպես ստեղծագործող մարդ, որպես կոմպոզիտոր կարևորում եմ նոր զարգացումներն ու որոնումները: Կինոերաժշտությունն ինձ հետաքրքրում է իր պատկերային համակարգով, իր պատմության բազմազանությամբ՝ էպիկ, էթնիկ, դասական միջավայրերի տարբերությունն ինձ շատ հետաքրքիր է երաժշտության տեսանկյունից: Անցած նոյեմբերին Կալիֆոռնիայի համալսարանում, որտեղ ես էլ եմ ուսանել, տեղի դահլիճում ևս այս գործը ներկայացվեց և շատ հետաքրքիր էր»:

Այս զրույցի ընթացքում նա պարզում է, որ Արցախում ևս կամերային նվագախումբ կա և ոգևորված այդ փաստից՝ խնդրում է ձայնագրություններ ուղարկել, որպեսզի լսի: Ընդհանրապես Սերժ Թանկյանը հայրենիքի ու հատկապես երիտասարդների հանդեպ չափազանց զգայուն տրամադրություն ուներ: Նա մեծ ներուժ է տեսնում երիտասարդների մեջ, ուստի «Orca»-ն աշխարհագրական նոր ճանապարհորդության նախապատրաստելու մեր առաջարկը կարծես թե հետքրքիր ընթացք է ունենալու:

 «Իմ գործունեության ամենաառաջին քայլերից սկասած, երբ դեռ չէի էլ պատկերացնում, թե ուր և որքան պիտի քայլեմ, միշտ ցանկացել եմ իմ սիրած գործին հետևել և դա մշտապես որպես սկզբունք ունենալ իմ կյանքում:- ասում է Թանկյանը՝ շարունակելով երաժշտական համադրությունների մասին զրույցը,- Հիմա, երբ արդեն հաջողել եմ առաջ գնալ իմ ստեղծագործական կյանքում, չեմ ուզում այլ ձևով այն օգտագործել: Միշտ ուզում եմ սրտիս բաղձանքն իբրև ստեղծագործական նյութ ունենալ, ես այն ես չեմ ուզում այլ կերպ ներկայացնել, եթե անգամ առավել շահութաբեր լինի այդ ճանապարհը: Չեմ ուզում նաև արդեն արած գործս անընդհատ կրկնել, քանի որ դարձյալ ավելի շահութաբեր է: Դա իմ համար չէ: Արտիստներ կան, որ սիրում են մնալ մեկ ֆորմայի մեջ, նույն սահմանում էքսպերիմենտներ անել, և դա նորմալ է: Բայց դա՝  նույն բանն անելը, ինձ համար չէ:

Թանկյանը և «SOAD»-ն այսօր աշխարհում հայտնի են ոչ միայն ռոք երաժշտությամբ, այլև արդարության համար պայքարող և իրենց ձայնով աշխարհում մեծ խնդիրների մասին ճչացող երաժիշտներ:

«Արդարությունն ինձ համար հավասարակշռությունն է:- ասում է Թանկյանը,- Արդարության դասն ինձ համար, անշուշտ, Հայոց Ցեղասպանության մերժման հարցով սկսվեց: Դա իմ առաջին դասն էր, երբ  հասկացա, որ աշխարհի մեջ նման անարդար մոտեցում կա նույնիսկ ժողովրդավար երկրների մեջ: Եվ դա աչքերս բացեց, որից հետո ես ուրիշ անարդարությունների  հետքերով ևս գնացի: Առաջին դասս էր հիմնական պատճառը, որ ես սկսեցի խորասուզվել այս ուղղությամբ, նոր օրինակներ տեսնել բնապահպանության, քաղաքականության,սոցիալական և տարբեր ոլորտներում: Այնքան հարցեր կան աշխարհի մեջ, որ երբեմն սկսում ես հոգնել, ուժասպառ լինել պայքարելուց: Եվ դա իսկապես դժվար է: Բայց քանի որ ես երաժիշտ եմ, միշտ ստեղծագործելու շնորհիվ կարողանում եմ շունչ առնել այս ճանապարհին և վերականգնվել:  Ես իմ ձայնն ու գրիչը արդարության համար եմ ներդրել և երգելով արդարության մասին եմ խոսքս ասում»:

Սերժ Թանկյանն ասում է, որ երաժշտությունը և արվեստի բոլոր ճյուղերը չեն կարող չար մարդուն միանգամից լավ մարդ դարձնել, բայց կարող է ազդել մտքի և հոգու վրա: «Մշակույթը բարձրացնում է ոգին, մեղմացնում է մարդուն և կարողանում է սրտի մեջ ունեցած ցանկությունները փոխել: Դժբախտաբար այդ ազդեցությունը վայրկյանական չէ, բայց եթե լիներ, ամեն ինչ շատ-շատ լավ կլիներ»:

Գլխավոր լուսանկարը՝ serjtankian.com-ի։

Լուսանկարները՝ Սարո Բաղդասարյանի, Քնար Բաբայանի։

Մեկնաբանություններ (1)

Վահան Ասրապեան
Համատարած ընտրակաշառքով ԱԺ ընտրութիւնները կեղծելու հակապետական հանցագործութիւնը աչքերդ չծակե՞ց, Սե՛րժ: Ինչու՞ չես խօսիր այդ հիմնահարցին մասին:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter