24 տարի բանտում գտնվող դատապարտյալը պայմանական չի ազատվի

24 տարի առաջ ազատազրկված նախկին զինծառայող, ցմահ 2-րդ կարգի հաշմանդամ, ցմահ դատապարտյալ Վահագն Մարուքյանը չի ներկայացվի պայմանական ազատման: Նրա ներկայացուցիչ Ռոբերտ Ռևազյանի բողոքն այսօր մերժեց Վերաքննիչ դատարանի դատավոր Արշակ Խաչատրյանը:

Վահագն Մարուքյանին դատարան բերեցին նշանակված ժամից 35 րոպե ուշացումով: Դատավորի հարցին պատասխանեելով՝ ուղեկցողը նշեց, որ դատապարտյալին դժվարությամբ են տեղափոխել: Վահագն Մարուքյանին այս անգամ դատարան էին բերել ոչ թե աթոռին նստած (ինչպես «Արթիկ» ՔԿՀ-ում), այլ՝ սայլակով: Հարցրեցի՝ ով է տրամադրել սայլակը, ասաց՝ «Դատապարտյալների հիվանդանոցից» են ուղարկել:

Ռոբերտ Ռևազյանը ներկայացրեց բողոքը՝ հիմնավորեց, թե ինչու պետք է բեկանվի Շիրակի մարզի ընդհանուր իրավասության դատարանի որոշումը, որով իրավաչափ էր ճանաչվել «Դատապարտյալների հիվանդանոց» ՔԿՀ-ի որոշումը՝ Վահագն Մարուքյանին պայմանական ազատման չներկայացնելու վերաբերյալ: Ըստ փաստաբանի, այդ որոշումը պատճառաբանված չէ, նշված չէ, թե կոնկրետ ինչում է թերացել դատապարտյալը, ինչ միջոցառումներ են կազմակերպվել, օրինակ, հիվանդանոցում, կամ «Նուբարաշեն», «Արթիկ» ՔԿՀ-ներում, որ Մարուքյանը չի մասնակցել: Եվ վերջապես՝ ինչ անհատական ուղղման ծրագրի մասին է խոսքը. «Անընդհատ պայմանական ազատման գործերով ՔԿՀ ներկայացուցիչները խոսում են ինչ-որ ուղղման ծրագրերից, բայց մի անգամ դատարանում չտեսանք դրանք»,-ասաց փաստաբանը:

Վահագն Մարուքյան. «Փաստորեն ինձ պատժում են չեղած բանը չանելու համար»  

Դատապարտյալի համար հասկանալի չէ, թե ինչ ծրագրի և ինչպիսի կետեր պիտի կատարեր 24 տարիների ընթացքում, որ չի կատարել. «Ի՞նչ պիտի անեի, որ չեմ արել՝ գաջ քաշեի՞, սվաղ անեի՞ խցում փակված: Փաստորեն, ինձ պատժում են չեղած բանը չանելու համար... ոչ էլ հաշվի են առել, որ 2-րդ կարգի ցմահ հաշմանդամ եմ»,-ասաց Վահագն Մարուքյանը:

«Դատապարտյալների հիվանդանոց» ՔԿՀ-ի ներկայացուցիչ Կարեն Հունանյանը նշեց, որ ցմահ դատապարտյալը 2 տույժ ունի, չի հատուցել տուժողներին պատճառված վնասը՝ ունի քաղաքացիական հայց՝ 500.000 դրամի չափով:

«Այն, որ անձը 24 տարվա մեջ 2 տույժ է ունեցել ընդամենը, դա վկայում է նրա մասին որ նա չարամիտ խախտող չէ, նույն բնութագրում նշված է, որ նա կոնֆլիկտային չէ, հաղորդակցվող է: Իսկ քաղաքացիական հայցը վճարելու համար դատապարտյալն անգամ առաջարկել է վճարել իր թոշակից ամեն ամիս»,-պարզաբանեց Ռոբերտ Ռևազյանը՝ դատարանի ուշադրությունը բևեռելով այն խնդրին, որ պայմանական ազատման հարցը համակարգային է:

Ռոբերտ Ռևազյանը զբաղվելու է նաև Վահագն Մարուքյանի առողջական հարցերով, քանի որ նա ունի պատժի կրման հետ անհամատեղելի հիվանդություն՝ ռևմատոիդ արթրիդ: Մարուքյանը բանտում էլ դարձել է հաշմանդամ: 24 տարի գտնվում է խցային պայմաններում: Արդեն մի քանի տարի է` նա չի կարողանում ինքնուրույն տեղաշարժվել:  

Վահագն Մարուքյանը կալանավորվել է 1993 թ.-ին՝ 19 տարեկանում: 1994 թ.-ին ՀՀ Գերագույն դատարանի դատավճռով դատապարտվել է մահապատժի (2003թ.-ից ՀՀ նախագահի հրամանագրով մահապատիժը փոխարինվել է ցմահ ազատազրկմամբ): Մարուքյանը մեղավոր է ճանաչվել Վանաձորի Ռազմական ոստիկանության պետի դիտավորյալ սպանության մեջ: Դատավճռի հիմքում դրվել է նաև նրա ինքնախոստովանական ցուցմունքը, որը, իր խոսքով, տվել է բռնության հետևանքով: