Ամալյա Մարգարյան

Աննա Նասիբյանը Երևանում համալսարանն ավարտելուց հետո Կողբ է վերադարձել, նկարչություն դասավանդել տեղի գեղարվեստի դպրոցում։ «Դժվար էր, քանի որ պետք է ընտրություն կատարեի Երևանում և գյուղում առաջարկվող աշխատանքների միջև», -ասում է Աննան:   

Նա պատմում է, որ գեղարվեստի դպրոցում աշխատելու հետ զուգահեռ իր կոլեգաների՝ Արուսյակ Փաշիկյանի և Սաթենիկ Ղուլիջանյանի հետ ձեռագործության խումբ են հիմնել՝ «Երեքնուկ» անունով, և սկսել ձեռագործ աշխատանքներ պատրաստել: «Հիմնադրումից առաջ մտածում էինք՝ ի՞նչ անել, որը և' նոր կլիներ, և' կտարբերվեր: Սկսեցինք բնական կաշվի վրա նկարել, և դրանից պատրաստել դրամապանակներ, պայուսակներ, աքսեսուարներ, հուշանվերներ»,- հիշում է Աննան:

«Երեքնուկը» ստեղծելու գաղափարն առաջացավ այն ժամանակ, երբ ինքներս պետք է մեր նյութերի համար գումար վաստակեինք և աշխատանքների վաճառքից ստացած գումարով հոգայինք գեղարվեստի դպրոցի ծախսերի մի մասը»,- ավելացնում է Սաթենիկ Ղուլիջանյանը:

«Երեքնուկը» արդեն 12 տարի է գործում է, խմբի անդամները պատրաստում են կաշվե նկարազարդ դրամապանակներ, պայուսակներ, ակնոցի պատյաններ, թևնոցներ, մետաղյա զարդեր և այլ հուշանվերներ: Աննա Նասիբյանը նշում է, որ «Երեքնուկ» անունը կապված է տարածաշրջանում տարածված նույնանուն բույսի հետ:

«Որպես մեզ ներկայացնելու միջոց` բնության մի դետալ ընտրեցինք: Երեքնուկը երեք տերև ունի, իսկ մեր խումբը՝ երեք հիմնադիր»,- ասում է Աննան։

Աննա Նասիբյանը

«Երեքնուկի» անդամները ձեռագործ իրերի վրա պատկերում են հայկական զարդանախշեր, խորհրդանիշներ, մուլտֆիլմերի և գրքերի հերոսներ: Ձեռագործ աշխատանքները պատրաստելու համար օգտագործում են բնական կաշի, մետաքս, տարբեր ներկեր և այլ նյութեր:

«Մեր աշխատանքները բազմազան են, նկարազարդման թեմաները նույնպես` սկսած հայկական ազգային զարդանախշերից, դեկորատիվ նախշերից մինչև գունանկարներ: Որպես առանձին ճյուղ` օգտագործում ենք մանրանկարչությունը: Պայուսակների, դրամապանակների, պատյանների վրա պատկերվող սիմվոլները վերցված են հայկական մանրանկարչության դետալներից։ Ես հաճախ մանրանկարներ եմ անում, Սաթենիկը` դեկորատիվ պատկերներով նկարազարդումներ, իսկ Աննան դիզայնով է զբաղվում»,- ասում է Արուսյակ Փաշիկյանը:

Արուսյակ Փաշիկյանը

«Երեքնուկի» առաջին համագործակցությունը եղել է Գաֆեսճեան արվեստի կենտրոնի հետ, հետո ցուցահանդեսների են մասնակցել, աշխատանքները հուշանվերների խանութներում ներկայացրել: Հիմա համագործակցում են «Հայրենիքի զարգացման նախաձեռնություն հիմնադրամի» հետ, ինչի շնորհիվ աշխատանքները ներկայացնում են ոչ միայն Հայաստանում և Արցախում, այլև Կանադայում, Գերմանիայում, Նորվեգիայում։ Արուսյակն ասում է, որ փորձառությունն արվեստում կարևորում է, նշում է, որ դժվարությունների հիմնական փուլն արդեն հաղթահարել են, իսկ առաջ եկող դժվարությունները` հեռավորությունը, գնորդների հետ կապը փորձում են լուծել համացանցի միջոցով:

Սաթենիկ Ղուլիջանյանը հիմա ապրում ու աշխատում է Գերմանիայում, նշում է, որ հեռավորությունը խանգարող դեր է ունեցել, սակայն չի դադարել աշխատել, որի շնորհիվ նոր հնարավորություն է ստացել ներկայանալ Հայաստանից դուրս և ներկայացնել ստեղծագործական խմբի աշխատանքները:

Սաթենիկ Ղուլիջանյանը

««Երեքնուկը» ստեղծագործելու անսպառ միջոց է։ Ստեղծում ես, զարգացնում ես, ու կատարածդ կաթիլ-կաթիլ նստվածք է տալիս, «Երեքնուկն» այդպես ենք զարգացրել, դա ամենակարևորն է»,- ասում է Աննան:

Հիմնադրումից հետո «Երեքնուկին» է միացել Արա Ղուլիջանյանը, նա զարդեր է պատրաստում մետաղից: Երեքնուկ» ստեղծագործական խումբը համախմբում է նաև տարածաշրջանի` ձեռագործությամբ զբաղվող երիտասարդներին, ովքեր նույնպես իրենց մասնակցությունն են ունենում «Երեքնուկի» ստեղծագործական աշխատանքներում:

լուսանկարը` «Երեքնուկ»-ի ֆեյսբուքյան էջից