Սևանա լճում իշխանի պաշարների վերականգման համար կհատկացվի 2 միլիարդ դրամ
Սևանա լճում իշխանի պաշարների վերականգնման և ձկնաբուծության զարգացման համալիր ծրագրի իրականացման անհրաժեշտության համար կառավարության պահուստային ֆոնդից գյուղատնտեսության նախարարությանը կհատկացվի 2 միլիարդ դրամ։
Որոշման այս նախագիծը կառավարության այսօրվա նիստին ներկայացրել էր գյուղատնտեսության նախարար Իգնատի Առաքելյանը։ Ինչպես ասվում է գործադիր բերված փաստաթղթերում՝ այդ գումարի հատկացումը պայմանավորված է Սևանա լճում իշխանի պաշարների վերականգնման և ձկնաբուծության զարգացման համալիր ծրագրի իրականացման անհրաժեշտությամբ:
Նախագծում մանրամասնվում է, որ 2014-ին ստեղծվել է «Սևանի իշխան», իսկ 2015-ին՝ «Սևան Ակվա» ՓԲԸ-ները։
«Սևանի իշխան»-ը իրականացնում է մանրաձկան և ձկան վերամշակման գործարանների շինարարությունը և շահագործումը, իսկ «Սևան Ակվա»-ն լճում կատարում է ցանցավանդակային տնտեսության հիմնման և շահագործման աշխատանքները:
Այս ընկերությունների համալիր ծրագրի շրջանակներում ավարտվել են մանրաձկան արտադրություն գործարանի շինարարական աշխատանքները և այն հանձնվել է շահագործման, լճում տեղակայվել է առաջին ցանցավանդակային տնտեսությունը: Սակայն ծրագրով նախատեսվում է 2017 թվականին Սևանա լճում տեղակայել ևս մեկ ցանցավանդակային տնտեսություն, որը բաղկացած կլինի 12 ցանցավանդակներից։
Գործընթացի արժեշղթայի ամբողջականությունն ապահովելու նպատակով հանձնաժողովը նախատեսել է նաև կառուցել բացօթյա ավազաններ՝ ձկան ծնողական կազմի համար, ինչպես նաև ձկան բազմացման կայան (սելեկցիոն տնտեսություն):
Ապրանքային ձկան արտադրությունը իրականացվելու է լճում տեղակայված տնտեսություններում, այդ պատճառով այդ գործընթացը իրականացնելու նպատկով անհրաժեշտ է ունենալ համապատասխան ջրային փոխադրամիջոցներ, սպասարկման, այլ ընթացիկ աշխատանքները կազմակերպելու համար: Այս աշխատանքների կազմակերպման նպատակով էլ կառավարության պահուստային ֆոնդից տրվելու է 2 մլրդ դրամը։
Որպես ակնկալով արդյունք` նշվում է ձկան արտադրության արժեշղթայի օղակների ստեղծումը և գործունեության արդյունավետ կազմակերպումը, որի հետևանքով էլ, ըստ նախարարության, Սևանա լճում կվերականգնվի իշխանի պաշարները։
Մեկնաբանել