Հինգշաբթի, 17 օգոստոսի

Երեք տարվա ազատազրկում՝ Խորենացիում զանգվածային անկարգությունների համար մեղադրվողին



Ամալյա Մարգարյան

Խորենացի փողոցում զանգվածային անկարգություններ կատարելու համար մեղադրվող Արման Առաքելյանի նկատմամբ դատարանը՝ Մնացական Մարտիրոսյանի նախագահությամբ, 3 տարվա ազատազրկման դատավճիռ է կայացրել:

Այսօրվա նիստի ընթացքում Արման Առաքելյանը վերջին խոսքը հնցեչնելու ժամանակ մեղքն ընդունել է և հայտնել, որ զղջում է կատարածի համար: Այս մասին «Հետքի» հետ զրույցում հայտնեց փաստաբան Արա Ղարագյոզյանը:

Նիստի ընթացքում մինչև մեղադրյալին վերջի խոսքի իրավունք տրամադրելը, պաշտպան Արա Ղարագյոզյանը հանդես է եկել պաշտպանական ճառով և դատարանից արդարացման դատավճիռ պահանջել: Արա Ղարագյոզյանը հայտնեց, որ ուրիշի կատարած գործողության համար իր պաշտպանյալն է պատասխան տալիս: «Իմ ճառով հիմնավորեցի, որ վարույթն իրականացնող մարմինը չի ապացուցել, որ տուժող ոստիկաններին կոնկրետ Արման Առաքելյանն է հարվածել: Տուժողներն իրենց ցուցմունքերով նույնպես ասել են, որ Արման Առաքելյանը չի հարվածել»,- հայտնեց փաստաբանը:

Արա Ղարագյոզյանը նշեց նաև, որ Արման Առաքելյանի դեմ ցուցմունք տված միակ վկային իրենք չեն կարողացել հարցաքննել՝ դատարան չներկայանալու պատճառով: «Այս ցուցմունքը համաձայն Եվրոպական դատարանի որոշումների՝ համարվում է անթույլատրելի ապացույց, ինչպես նաև նշեմ, որ վկան քննիչի սենյակում է վկա դարձել և տեսանյութի վերաբերյալ ցուցմունք տվել: Եթե այդպես լինի, ապա ամբողջ ՀՀ բնակչությունը սույն քրեական գործով պետք է հանդես գա որպես վկա, քանի որ բոլորը նույն տեսանյութը դիտել են»,- հայտնեց փաստաբանը:

Արա Ղարագյոզյանը նշեց նաև, որ տեսանյութը դատահամակարգչային փորձաքննություն չի անցել և հստակեցված չէ` արդյոք հուլիսի 20-ին է նկարահանվել, թե ոչ:

Փաստաբանը հայտեց նաև, որ 2016-ի հուլիսի 20-ին տեղի չեն ունեցել զանգվածային անկարգություններ. «Հավաքը սկսվելուց առաջ կրել է խաղաղ բնույթ, նախօորոք պլանավորված ջարդեր, հրկիզումներ չեն եղել, իսկ հավաքի մասնակիցների ձեռքերին արգելված առարկաներ չեն կրել»:

Փաստաբանը հայտնեց, որ դատարանի կայացրած վճիռը բողոքարկելու է վերաքննիչ դատարանում:

Հիշեցնենք, որ Արման Առաքելյանին մեղադրանք է առաջադրվել 2016թ. հուլիսի 20-ին Երևան քաղաքում տեղի ունեցած զանգվածային անկարգությունների ընթացքում ոստիկանության աշխատակիցների նկատմամբ բռնություն գործադրելու համար։ Մեղադրանք է առաջադրվել ՀՀ Քրեական օրենսգրքի 225-րդ հոդվածի 2-րդ մասով (պատժվում են ազատազրկմամբ` երեքից ութ տարի ժամկետով, եթե այդ արարքները կատարելն ինքնին չի առաջացնում սույն օրենսգրքի այլ հոդվածներով ավելի խիստ պատասխանատվություն):


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ