Պաշտպանության նախարարն այցելել է Տավուշի մարզ
Ապրիլի 22-ին ՀՀ պաշտպանության նախարար Վիգեն Սարգսյանն աշխատանքային այցով եղել է Տավուշի մարզում:
Պաշտպանության նախարարը եղել է նաև սահմանամերձ Մովսես և Չինարի համայնքներում: Համայնքների բնակչության հետ անմիջական զրույցների ընթացքում Վիգեն Սարգսյանը մեկ անգամ ևս քննարկել է համայնքների առջև ծառացած առավել կարևոր խնդիրները, ծանոթացել դրանց լուծման առնչությամբ ներկայացված առաջարկներին: Պաշտպանության նախարարն ընդգծել է, որ սահմանամերձ համայնքները բացառիկ նշանակություն ունեն մեր պետության և զինված ուժերի համար, ուստի համայնքների բնակիչներին հուզող խնդիրները պաշտպանական քաղաքականության իրագործման և անվտանգության ապահովման տեսանկյունից մշտապես հանրապետության ռազմաքաղաքական ղեկավարության ուշադրության կենտրոնում են:
Տավուշի մարզպետարանում երեկոյան կայացել է սահմանամերձ համայնքներում համակարգման ենթակա հարցերի լուծման նպատակով ստեղծված միջգերատեսչական հանձնաժողովի արտագնա նիստը, որը ղեկավարել է հանձնաժողովի նախագահ, ՀՀ պաշտպանության նախարար Վիգեն Սարգսյանը:
Նիստի ընթացքում սահմանամերձ համայնքներում իրականացված ուսումնասիրությունների, կատարված և ընթացող աշխատանքների վերաբերյալ զեկույցներով հանդես են եկել հանձնաժողովի կազմում ընդգրկված գերատեսչությունների ներկայացուցիչներ, համայնքների ղեկավարներ, ինչպես նաև մարզում տարաբնույթ ծրագրեր իրականացնող միջազգային կառույցների ներկայացուցիչներ:
Կարևորելով միջգերատեսչական փոխգործակցության բարձր մակարդակը՝ ՀՀ պաշտպանական գերատեսչության ղեկավարը վստահություն է հայտնել, որ հանձնաժողովի գործունեությունը նպաստելու է սահմանամերձ համայնքներում առկա խնդիրների համակարգմանն ու լուծմանը:
Մեկնաբանել