Հայաստանի, Ռուսաստանի և Բելառուսի քննչական կոմիտեների նախագահները համատեղ հայտարարություն են ստորագրել
Քննչական կոմիտեն տեղեկացնում է, որ Ռուսաստանի Դաշնության Սանկտ Պետերբուրգ քաղաքում մեկնարկել է Հայաստանի Հանրապետության, Բելառուսի Հանրապետության և Ռուսաստանի Դաշնության քննչական կոմիտեների համատեղ կոլեգիայի առաջին նիստը, որին մասնակցում են նշված երեք երկրների քննչական կոմիտեների նախագահներ Աղվան Հովսեփյանը, Իվան Նոսկևիչը, Ալեքսանդր Բաստրիկինը։
Նիստի ընթացքում քննարկվել է իրավական համագործակցությանը և փորձի փոխանակմանը վերաբերող հարցերի լայն շրջանակ, որի արդյունքներով՝ ՔԿ նախագահ Աղվան Հովսեփյանը, ԲՀ ՔԿ նախագահ Իվան Նոսկևիչը և ՌԴ ՔԿ նախագահ Ալեքսանդր Բաստրիկինն ստորագրել են համատեղ հայտարարություն։
Կողմերը պատրաստակամություն են հայտնել նպաստել միջգերատեսչական համագործակցության արդյունավետության բարձրացմանը, ինչպես նաև ազգային օրենսդրության համաձայն՝ զարգացնել փոխգործակցության նոր ուղղություններ, լրացուցիչ միջոցներ ձեռնարկել՝ իրավական օգնության վերաբերյալ միջազգային հարցումների կատարման ժամկետները կրճատելու ուղղությամբ։ Բացի այդ՝ համաձայնություն է ձեռք բերվել նպաստել առանձին հանցատեսակների քննության մեթոդիկայի վերաբերյալ փորձի փոխանակմանը, համատեղ գիտագործնական կոնֆերանսների, սեմինարների անցկացմանը։
Մեկնաբանել