«ԵԼՔ»-ը 7/51 և 7/53 ընտրատեղամասերում վերահաշվարկ է անելու
«ԵԼՔ» դաշինքի պահանջով 14։00-ին 7/51 և 7/53 ընտրատեղամասերում վերահաշվարկ է լինելու։
Դաշինքի մամուլի խոսնակ Տիգրան Ավինյանը «Հետք»-ին հայտնեց, որ վերահաշվարկը պայմանավորված է իրենց կայքում՝ http://real-elections.com/-ում, արձանագրված տվյալների և վերջնական քաղվածքում գրանցված ձայների տարբերությամբ։ Ավինյանի փոխանցմամբ՝ ամեն ընտրատեղամասում տասնյակից ավելի ձայների տարբերություն է եղել. «Կարծում եմ՝ հաշվարկի ժամանակ խախտումներ հնարավոր էին, և վերահաշվարակը հենց դրա համար է լինելու, որպեսզի պարզենք՝ արդյոք «Ելք» դաշիքնի կամ որևիցէ այլ քվեաթերթիկ գնացել է Հանրապետականին, թե ոչ»,- ասաց խոսնակը։
Դեռ երեկ հրավիրված ասուլիսի ժամանակ պատգամավոր Էդմոն Մարուքյանը հայտարարել էր, որ եթե դաշինքը նպատակահարմար գտնի և ապացույցների բազան իրենց թույլ տա, 3-5 ընտրատեղամասերում վերահաշվարկի դիմումներ կներկայացնեն։ Մարուքյանը թեև ընդգծել էր, որ ընտրությունների արդյունքի վրա դրանք ազդեցություն չեն ունենա, սակայն հավելել էր, որ նպատակը իրենց ստացած յուրաքանչյուր քվեն պահելն է։
Մեկնաբանել