«Ֆեյսբուք»-ի օգտատեր Ներսես Մանանյանը սոցիալական ցանցում հրապարակել է տեսանյութ, որտեղ Ծաղկունյաց լճի ափի երկայնքով սատկած ձկներ են ընկած։

Բնապահպանության նախարարության տեղեկատվության և հասարակայնության հետ կապերի վարչության պետ Արմեն Վարդանյանը «Հետք»-ի հետ զրույցում նշեց, որ նախարարության տեսուչները արդեն գնացել են այդ տարածք, նմուշառել են ջուրը և պարզել, որ այն մաքուր է։

«Տեսաձայնագրությունից էլ երևում է, որ ձկները քայքայված, կիսանեխած վիճակում են։ Նախնական տվյալներով՝ ձկների անկումը պայմանավորված է թթվածնային քաղցով, ինչն էլ պայմանավորված է եղել լճի սառցակալումով։ Ամբողջովին սառցակալվել է լիճը, թթվածնային քաղցից անկում է տեղի ունեցել»,- նշեց Վարդանյանը։

Այսինքն, ըստ նախարարության ներկայացրած վարկածի, ձյունը հալվել է, և ալիքները ափ են դուրս բերել սատկած ձկներին։

Վարդանյանը նշեց, որ սա այդ տարածքի համար աննախադեպ է, սակայն դժվարացավ ասել` արդյոք ջուրը նախկինում նույնքան չի սառել։