Երեկ գրել էինք, որ Հրաչիկ Միրզոյանը հրապարակել էր հատված ծառերի լուսանկարներ, որոնք արել էր մայիսի 1-ին «Զիկատար» արգելավայրին կից տարածքում։:

Այսօր «Հայանտառ» ՊՈԱԿ-ի Նոյեմբերյանի անտառտնտեսության մասնաճյուղի տնօրեն Վասիլ Չիլինգարյանը  «Հետք»-ին հայտնեց, որ «Զիկատար» արգեվայարի տարածքին կից անտառահատումները օրինական կերպով են արվել։

Ըստ նրա՝ ծառերի վրա անտառապետի կնիքը դրված է և դրանք փաստում են, որ ծառերը անօրինական կերպով չեն հատվել. «Բոլոր ծառերը համարակալված են, կնիքը դրված է։ Ոչ մի առանց կնքելու ծառ չկա։ Այդ ծառահատումները լրիվ օրինական են, դրանք գրանցված են։ Այդ ծառահատումները կատարվել են տապալված ծառերից։ Դրանք ենթակա էին հատման և ռեալիզացման»,- նշեց նա։

Տնօրենը հավաստում է, որ ամեն  ծառի համար անձամբ է պատասխանատու, իսկ հատված ծառերը քամատապալ են եղել, ֆիքսված էին, և պետական տոմսով էլ դրանք  մակագարված են որպես քամատապալ ծառեր։

Չիլինգարյանի հաղոդմամբ՝ ծառերը տապալվել են ուժգին քամուց և այստեղ ընդգծում է, որ 2015-ի նոյեմբերի 13-ին և 2016-ի փետրվարին այդ տարածքում ուժեղ փոթորիկներ են եղել, որոնց պատճառով հազարավոր ծառեր քամատապալ են եղել, իսկ  միայն 2016-ին  քամատապալ 14000 ծառ են կնքել։