Սոցօգնություն ստացողների բարեկամ լինել-չլինելու հարցը թողեցին համայնքապետերի խղճի վրա
Գայանե Սարգսյան
«Վերջին ամիսների վերլուծությունը ցույց է տալիս, որ համայնքների սեփական եկամուտների հավաքագրման ցուցանիշներում անկման միտում է նկատվում»,- այսօր Վանաձորում կայացած Լոռու մարզխորհրդի նիստի ժամանակ տեղեկացրեց Լոռու մարզպետարանի ֆինանսական և սոցիալ-տնտեսական վարչության պետ Հրայր Պապոյանը:
Այս տարվա 4 ամիսների կտրվածքով, նախորդ տարվա համեմատ, ավելի քիչ հավաքագրում են ապահովել մի շարք համայնքներ. մինչև 60 % հավաքագրում է ապահովել 16 (2016-ին՝ 15), 60-80% ՝ 18 (2016-ին՝ 21), 80-100%՝ 28 (2016-ին՝ 38) համայնք:
Սեփական եկամուտների հավաքագրման առավել ցածր ցուցանիշ ապահոված համայնքներն են` Պաղաղբյուրը (34%), Պետրովկան (34%), Սարալանջը (41%), Չկալովը (43%), Հալլավարը (47%), Նոր Խաչակապը (48%), Մղարթը (50%):
2017թ.-ի 4 ամիսների ընթացքում մարզի համայնքները հողի հարկի հավաքագրման պլանը կատարել են 82%-ով՝ 98 մլն դրամ պլանի դիմաց հավաքագրելով 80 մլն դրամ:
Հողի հարկի գծով մինչև 50% հավաքագրման ցուցանիշ է ապահովել 17 համայնք: Դրանք են՝ Ուրասար, Ագարակ, Շահումյան, Հալլավար, Քարաբերդ, Ճոճկան, Չկալով, Նորաշեն, Նովոսելցովո, Ձյունաշող, Պետրովկա, Պաղաղբյուր, Դաշտադեմ, Պրիվոլնոյե, Նոր Խաչակապ, Սարալանջ, Գոգավան:
Տեղական տուրքերի գծով հավաքագրման ցուցանիշի նվազում ունի 38 համայնք, այդ թվում՝ Ջրաշեն, Սարահարթ, Սարչապետ, Ճոճկան, Կարմիր Աղեգ, Արդվի, Փամբակ, Եղեգնուտ, Ագարակ համայնքները: Եվս 7 համայնքներում, (Ուրասար, Բովաձոր, Մղարթ, Կաթնառատ, Արծնի, Արևաշող, Գեղասար, Գոգարան) ի տարբերություն նախորդ տարվա, ընդհանրապես գանձումներ չեն եղել:
«Այսօրվա` մայիսի 29-ի դրությամբ` մարզի երկու համայնքներում՝ Ջրաշենում ու Սարամեջում, սեփական եկամուտների գծով ընդհանրապես մուտքեր չեն եղել, ևս 18 համայնքում մուտք չեն ունեցել հողի հարկի գծով»,- նշեց Հ. Պապոյանը:
_Այսօր վճարում ունեցել ենք,- դահլիճից բարձրաձայնեց Ջրաշենի համայնքապետը:
_Քո հողի հարկը ինչո՞ւ չես մուծել,- համայնքապետին դիմեց մարզպետ Արթուր Նալբանդյանը, հավելելով,- վաղը ևեթ ուղարկելու եմ քո բոլոր հարկերը` անձամբ նայեն:
Մարզի համայնքներում իրականացված վարչական հսկողության արդյունքներին անդրադարձավ Լոռու մարզպետարանի իրավաբանական բաժնի պետ, վարչական հսկողություն իրականացնող հանձնաժողովի նախագահ Ալիկ Սահակյանը:
Վերջինս նշեց, որ այս տարվա առաջին եռամսյակում արդեն իսկ ստուգումներ են իրականացվել մարզի 8 համայնքում (Ստեփանավան, Եղեգնուտ, Փամբակ, Քարաբերդ, Քարաձոր, Գարգառ, Շենավան, Միխայլովկա):
Խոսելով ֆինանսական բնագավառին առնչվող խախտումների մասին՝ Ա. Սահակյանն առանձնացրեց առավել հաճախ հանդիպող խախտումներից մի քանիսը.
«Համայնքի ղեկավարը տեղական հարկերը, տուրքերն ու վճարները չվճարող անձանց նկատմամբ օրենքով սահմանված կարգով պետք է կիրառի համապատասխան միջոցներ: Այս գործառույթը կիրառվել է միայն Ստեփանավան համայնքում, մնացած բոլոր համայնքներում համայնքների ղեկավարները խուսափում են ու հարկերը չվճարողների նկատմամբ վարչական վարույթ չեն իրականացնում: Չի պահպանվում գնումների գործընթացի կազմակերպման մասին ՀՀ կառավարության թիվ 168 որոշման 2-րդ կետի պահանջը, ըստ որի՝ մինչև յուրաքանչյուր տարվա փետրվարի 1-ը համայնքի ղեկավարը պետք է հաստատի գնումների պլանը և աշխատանքային տարվա ընթացքում սահմանված կարգով հրապարակի ինտենետային կայքում: Չի պահպանվում նաև «ՏԻՄ» օրենքի 84 –րդ հոդվածի 2-րդ կետի պահանջը, ըստ որի՝ մինչև համայնքի հնգամյա զարգացման ծրագրի կամ տարեկան բյուջեի նախագծերը համայնքի ավագանու հաստատմանը ներկայացնելը, պետք է կազմակերպվեն և անցկացվեն հանրային բաց լսումներ սահմանված ժամկետներում»:
Հանձնաժողովի նախագահը հատուկ անդրադարձ կատարեց նաև համայնքների ավագանու հաստատմամբ բնակիչներին հատկացվող սոցիալական օգնություններին՝ նշելով, որ «այս հարցը վերջերս հաճախ է բարձրաձայնվում: Ընդունելով հանդերձ, որ «ունենք որոշակի համայնքներ, որտեղ խախտվել է «ՏԻՄ» օրենքի 21-րդ հոդվածը, ըստ որի՝ համայնքի ավագանու անդամը չպետք է մասնակցի ավագանու այն որոշման քվեարկությանը, որն առնչվում է իր ընտանիքի անդամի հետ»՝ Ա. Սահակյանն ասաց.
«Մասնագիտական ստուգում իրականացնող աշխատանքային խումբը ստուգման ընթացքում չի կարող բացահայտել այդ օգնություն ստացողը, որ Սարգսյանն է, բարեկա՞մ է, թե՝ չէ: Այսինքն՝ դա թողնում ենք համայնքի ղեկավարի խղճի վրա»:
Հանձնաժողովի նախագահի այս դիտարկումն առավել քան զարմանալի է: Այս դեպքում հարց է առաջանում` համայնքի ավագանու գործառույթներին վերաբերող հարցաշարում համապատասխան տողի դիմաց հանձնաժողովն ինչպե՞ս է արձանագրում, որ խախտում չկա, եթե չի կարողացել ստուգել տվյալ կետի պահպանված լինել-չլինելու հանգամանքը: Թե՞, այս դեպքում, ստուգումը կրում է միմիայն ձևական բնույթ:
_Ամբողջ գյուղն իրար բարեկամ է,- հանձնաժողովի նախագահի խոսքին արձագանքեց գյուղապետերից մեկը:
Մարզպետը համայնքապետերին բացատրեց, թե, ըստ օրենքի, ովքեր են ավագանու անդամների հետ փոխկապակցված անձինք և որ դեպքերում է, որ ավագանու անդամն իրավունք չունի մասնակցել հարցի քվեարկությանը:
Մեկնաբանել