Տեսանյութեր
Լուսանկարներ
ԿԳՆ հուշամեդալ` Ֆրանսիական համալսարանի ներկայացուցիչներին
Կրթության և գիտության նախարարի պաշտոնակատար Լևոն Մկրտչյանն այցելել է Հայաստանում ֆրանսիական համալսարան: Լևոն Մկրտչյանը համալսարանի կայացման և կրթական ոլորտում ունեցած մեծ ներդրման համար նախարարության բարձրագույն պարգևով՝ «Ոսկե հուշամեդալով» պարգևատրել է համալսարանի գլխավոր քարտուղար Ալեքսանդրա Թիրկյուիր Մենսին, վարչաֆինանսական տնօրեն Վաղարշակ Մեյրոյանին և ՀՖՀՀ-ում Ժան Մուլեն Լիոն 3 համալսարանի կից դեկան Ժան-Բատիստ Կարտիեին: Այս մասին տեղեկացնում է ԿԳՆ մամուլի ծառայությունը։
Միջոցառմանը ներկա է եղել նաև Հայաստանում Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն: Ողջունելով պարգևատրվածներին և համալսարանի ներկայացուցիչներին՝ ԿԳ նախարարի պաշտոնակատարը շնորհակալություն է հայտնել բուհի ղեկավարությանը կրթական գործի կազմակերպման և ֆրանսիական բուհական փորձի տեղայնացման համար՝ ընդգծելով, որ Հայաստանի բարձրագույն կրթության բարեփոխումների գործընթացում Ֆրանսիական համալսարանի փորձն օգտակար և կարևոր է:
Լևոն Մկրտչյանի խոսքով՝ Հայաստանում Ֆրանսիական համալսարանը նաև ֆրանկոֆոնիայի կենտրոնի դեր է կատարում և հանդես է գալիս, որպես ֆրանսիական մշակույթի, արժեքների և լեզվի տարածող. «Հայ ժողովուրդն իր փորձությունների երկարատև ճանապարհին առանձնացրել է հատուկենտ քաղաքակրթություններ, որոնք հարազատ են մեզ, քանի որ դրանց հիմքում կան ընդհանուր արժեքներ: Ֆրանսիական քաղաքակարթությունը մեզ համար թանկ ու բարձր արժեք է և այդ իմաստով Ֆրանսիական համալսարանի գործունեությունը կարևոր է ոչ միայն կրթական, այլ նաև քաղաքակրթական իմաստով»,- իր խոսքում նշել է Լևոն Մկրտչյանը:
Կարևորելով նախարարության բարձր գնահատականը Ֆրանսիական համալսարանի թիմի կատարած աշխատանքին՝ Ֆրանսիայի արտակարգ և լիազոր դեսպան Ժան-Ֆրանսուա Շարպանտիեն նշել է, որ այս տարի լրանում է Ֆրանսիայի և Հայաստանի Հանրապետության միջև դիվանագիտական հարաբերությունների հաստատման 25 ամյակը. « Այս տարիների ընթացքում շատ կարևոր իրադարձություններ են տեղի ունեցել, սակայն ֆրանս-հայկական հարաբերություններում ամենահաջողված և վառ արտահայտված իրադարձությունը Հայաստանում Ֆրանսիական համալսարանի գոյությունն է»,- նշել է դեսպանը և հավելել, որ Ֆրանսիան պատրաստակամ է շարունակել աջակցությունը Հայաստանի երիտասարդների կրթությանը:
Մեկնաբանել