Արդարադատության նախարարության 2017 թվականի արտաբյուջեն կավելացվի 51 միլիոն դրամով։ 2017 թվականի հունվարին կառավարությունը կանխատեսել էր նախարարության այս տարվա արտաբյուջե մուտքագրել 230 միլիոն դրամ, սակայն մայիսի 11-ի դրությամբ այդ գումարից արդեն մուտքագրվել է 119 միլիոն դրամը։ Ամսական նախատեսված 19 միլիոն դրամի փոխարեն արդարադատության նախարարության արտաբյուջե է մուտքագրվել 26 միլիոն դրամ։

Նախորդ շաբաթ արդարադատության նորանշանակ նախարար Դավիթ Հարությունյանը կառավարություն էր ներկայացրել 2017թ-ի առաջին 4,5 ամիսների նախարարության արտաբյուջե մուտքագրված գումարների հաշվարկները։ 

Նախահաշվով պլանավորվածից 7,2 միլիոն դրամ ամսական ավել մուտքով նախարարությունը 51 միլիոն դրամով ավելացնելու է եկամուտներն ու ծախսերը: 

Ավելացվող այդ 51 միլիոն դրամից 49, 5 միլիոն դրամը նախարարությունը ուղղելու է

աշխատակիցների պարգևատրմանն ու դրամական խրախուսմանը, իսկ ներկայացուցչական ծախսերը ավելացնելու է 1,5 միլիոն դրամով։ 

Նախարարության արտաբյուջետային հաշվին 2016 թվականին վճարովի ծառայությունների մատուցման դիմաց մուտքագրվել է ավելի քան 220 միլիոն դրամ: