Կիրակի, 23 սեպտեմբերի

Նախկին գյուղապետն ու աշխատակիցները Արգինայի համայնքապետարանից արձակուրդայինի գումարները պահանջում են դատական կարգով



Արմավիրի մարզի սահմանամերձ Արգինայի համայնքապետարանը հայտնվել է անելանելի իրավիճակում: Համայնքապետարանի թվով չորս արդեն նախկին աշխատաակիցներ դիմել են Արմավիրի մարզի ընդհանուր իրավասության դատարան՝ պահանջելով իրենց չվճարված աշխատավարձերն ու արձակուրդային գումարները:

Արգինայի համայնքապետ Ռոստամ Արոյանը պաշտոնը ստանձնել է 2016թ. նոյեմբերի 1-ից: Նա «Հետքին» տեղեկացրեց, որ պարտքերը կուտակվել են 2012-2016 թվականների ընթացքում, ինչն այժմ լրացուցիչ բեռ է համայնքապետարանի համար:

«Մոտ ժամանակներս երևի այդ հարցերը կկարգավորենք: Բնակիչներին ծանուցել ենք, հարկերի հավաքագրում ենք կատարում, որ այդ պարտքերը շուտ մարենք»,-ասաց համայնքապետը: Ռոստամ Արոյանը նշեց, որ գյուղացիների կողմից նախոդ տարիներին չվճարված հարկերի գումարը մեծ թիվ է կազմում և հավաքագրման աշխատանքները հիմնականում այդ ուղղությամբ են տարվում:

«Մարդիկ կան, որ Ռուսաստանում են, այստեղ մարդ չկա և նրանց հարկերը տարեց տարի ավելանում է ու չգիտենք` ինչպես հավաքագրենք»,-հավելեց համայնքապետը՝ այդպես էլ չհիշելով, թե որքան է կազմում ապառքների գումարի չափը:

Արգինայի համայնքապետարանի հաշվապահ Սամվել Ստեփանյանն ասաց, որ նախկին աշխատակիցներ՝ համայնքապետ Մուշեղ Գրիգորյանի, աշխատակազմի քարտուղար Սասունիկ Հարությունյանի և հաշվապահ Սևակ Ֆիդանյանի հայցադիմումները վերաբերում են վերջնահաշվարկներին, չի վճարվել նրանց արձակուրդային գումարները: Իսկ համայնքի մանկապարտեզի նախկին տնօրեն Մարգարիտ Հովhաննիսյանի դեպքում չի վճարվել և աշխատավարձը, և արձակուրդայինը:

Սամվել Ստեփանյաննն ասաց, որ համայնքապետին, աշխատակազմի քարտուղարին և հաշվապահին ունեցած պարտքը կազմում է մոտ 1 միլիոն 600 հազար դրամ, իսկ մանկապարտեզի տնօրենի դեպքում՝ 383 հազար դրամ է:

«Այս պահին այդ աշխատակիցների աշխատավարձերը, արձակուրդայինները վճարելու համար ազատ միջոցներ չունենք: Արդեն դժվարություն է առաջացել մեզ համար, միջոցներ չկան»,-նշեց Սամվել Ստեփանյանը:

Արգինայի նախկին 4 աշխատակիցներից միայն աշխատակազմի քարտուղար Սասունիկ Հարությունյանի վերաբերյալ է Արմավիրի մարզի ընդհանուր իրավասության դատարանն օրեր առաջ վճիռ կայացրել: Դատարանը որոշել  է Արգինայի համայնքապետարանից հօգուտ Սասունիկ Հարությունյանի բռնագանձել 592 հազար 174 դրամ վերջնահաշվարկի պարտքի գումար: Միաժամանակ վճռվել է 01.11.2016 թվականից մինչև պարտավորության դադարման օրը, համայնքապետարանից նշված գումարի վերաբերյալ հօգուտ նախկին աշխատակցի բռնագանձել նաև Կենտրոնական բանկի սահմանած բանկային տոկոսներ:

Արգինայի համայնքապետարանի հաշվապահի խոսքերով՝ համայնքային բյուջեն՝ ներառյալ դոտացիան, կազմում է մոտ 18,5 միլիոն դրամ: Սամվել Ստեփանյանն ասաց, որ այս պահին գումար չունեն և չեն կարողանում վճարեն նաև գործող աշխատակիցների աշխատավարձերը: Օրինակ՝ 2017թ-ին վճարվել է միայն 2 ամսվա աշխատավարձ:

Ներկա դրությամբ գործող աշխատակիցներին համայնքապետարանի ունեցած պարտքը կազմում է մոտ 1 միլիոն 100 հազար դրամ: Տարվա առաջին ամիսներին ունեցել են ընդամենը 3 աշխատող, քանի որ նախկին աշխատակիցներն աշխատանքից ազատվելու դիմում էին ներկայացրել: Այժմ Արգինայի համայնքապետարանում աշխատում է 6 անձ:

Սամվել Ստեփանյանը ևս շեշտեց տարիներով կուտակված ապառքները: Նրա ասելով՝ հարկերի չվճարումը սոցիալական պատճառներ ունի, մարդիկ վատ վիճակում են:

«Որ մարդիկ գումար ունենային՝ կվճարեին, այս խնդիրներն էլ չէին առաջանա: Եթե մուտքեր չկան, մենք ինչպես կարող ենք ելք անել, աշխատավարձ վճարել»,-ավելացրեց համայնքապետարանի աշխատակիցը:

Արմավիրի մարզպետարանի տրամադրած տեղեկատվության համաձայն՝ մայիսի 1-ի դրությամբ հողի հարկի հավաքագրման ցուցանիշը Արգինայի համայնքապետարանը կատարել էր պլանավորածի 4.3%-ի չափով, գույքահարկինը՝ 31.8%:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ