Էնֆիաջյանը թերահավատ է կառավարության ծրագրի իրականացման հարցում
«Ծառուկյան» դաշինքի պատգամավոր Վահե էնֆիաջյանը կառավարության 2017-2022 թվականների ծրագրի քննարկման ժամանակ, վարչապետին ցույց տալով իրենց դաշինքի 2017 թվականի ծրագիրը, հետաքրքրվեց՝ արդյոք Կարապետյանը ծանոթացել է այնտեղ ներառված 15 կետերին, ոլորտ առ ոլորտ իրենց քաղաքական թիմի կողմից ներկայացված խնդիրների լուծման տեսլականին։
«Ի՞նչն է պատճառը, որ քաղաքական մեծամասնության կողմից ականջալուր չեն լինում այլ քաղաքական ուժերի կողմից ներկայացրած առաջարկություններին և ծրագրային մոտեցումներին»,-հարցրեց պատգամավորը։
Ասում է՝ իրենց ներկայացրած ծրագրին հավանություն է տվել Հայաստանի շուրջ 430 հազար քաղաքացի։ Այդ իսկ պատճառով քաղաքական առումով ճիշտ կլիներ, որպեսզի հղում անելով իրենց ծրագրին, այն ծրագրային մոտեցումները, որոնք իրատեսական են, խորը ուսումնասիրության և վստահության են արժանացել, նաև ներառվեին կառավարության ծրագրում։ Պատգամավորի գնահատմամբ՝ այդկերպ առաջիկա հինգ տարիների ընթացքում կառավարությունը կկարողանար ի վերջո լուծել երկրում առկա խնդիրները։
Պատգամավորը նաև հետհայացք գցեց կառավարության 2012-2017 թվականների ծրագրին՝ մատնանշելով բացթողումներն ու չարված աշխատանքները։ Մասնավորապես՝ մեջբերեց արտահանման աճի տեմպերի ապահովումը, որի արդյունքում 2012-2017 թվականներին արտահանումն աճելու էր ավելի մեծ տեմպով, քան ներմուծումը։ «Խնդիրը չի լուծվել», - ասաց Էնֆիաջյանը։
Խոսեց նաև նվազագույն աշխատավարձը կրկնակի աճի մասին։ Հիշեցրեց, որ 2012թ.-ին նվազագույն աշխատավարձը 32 500 դրամ էր, սակայն այս տարիներին այն պետք է դառնար 65 000 դրամ։ «Պետք է արձանագրենք՝ խնդիրը կրկին չի լուծվել», - հավելեց Էնֆիաջյանը։
Պատգամավորը հիշեցրեց նաև աղքատության մասին։ Ասաց՝ 2012-ին աղքատ էր Հայաստանի բնակչության 32,4 %-ը, 2015-ին՝ 29,8 %-ը, որոնցից 10,4 %-ը` շատ աղքատ, 2 %-ը՝ ծայրահեղ աղքատ. «Խոստումը իրականացնելու դեպքում աղքատությունը Հայաստանի Հանրապետությունում կկազմեր 24.4 %։ Խնդիրը ըստ էության խոստացված տոկոսներով, եթե համեմատության մեջ դնենք, ընդամենը իրականացվել է 24-ից 30 տոկոս հարաբերակցությամբ»։
Ելույթը Էնֆիաջյանն ավարտեց վատատեսական նոտայով, ասելով, որ անցած 5 տարիներին այն ծրագրային մոտեցումները, որոնք ներկայացրել է Հանրապետական կուսակցությունը իրականություն չի դարձել, այդ իսկ պատճառով իրենց դաշինքը լավատեսական չէ, որ ծրագրում ներառված մոտեցումները առաջիկա տարիների ընթացքում կիրականանան։
Մեկնաբանել