«Ելք» դաշինքի պատգամավոր Նիկոլ Փաշինյանը երկու օր առաջ «Ֆեյսբուք» սոցիալական ցանցի իր էջում գրառում էր կատարել՝ հայտնելով, որ խմբակցությունը գրություն է ուղարկելու գլխավոր դատախազ Արթուր Դավթյանին` միջնորդելով կալանքից ազատ արձակել «Նոր Հայաստան» նախաձեռնության անդամ, նախագահի նախկին թեկնածու Անդրիաս Ղուկասյանին։

Փաշինյանի փոխանցմամբ՝ ԵԼՔ-ի պատգամավորները պատրաստ են նաև հանդես գալ որպես Անդրիաս Ղուկասյանի երաշխավոր:

Ինչպես «Հետք»-ին հայտնեցին գլխավոր դատախազության հանրային կապերի բաժնից՝ դատախազությունը երեկ ստացել է «ԵԼՔ» խմբակցության այդ դիմում-նամակը։ Այն ստորագրել են խմբակցության 7 պատգամավորներ։ Այս պահին դատախազությունը քննարկում է Անդրիաս Ղուկասյանին կալանքից ազատ արձակելու միջնորդության գրությունը։

Հիշեցնենք, որ Ղուկասյանը մեղադրվում է Սարի թաղում զանգվածային անկարգություններ կազմակերպելու մեղադրանքով։ Դատարանը մերժել է Ղուկասյանին գրավի դիմաց կալանքից ազատելու միջնորդությունները։

Հունիսի 19-ին Վերաքննիչ դատարանը քննում էր Անդրիաս Ղուկասյանի կալանքի ժամկետը 5-րդ անգամ երկարացնելու որոշումը, սակայն նիստը հետաձգվել է՝ առանց որոշում կայացնելու։