HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Ավագանու ընտրություններին «Հայկական ժամանակ»-ի լրագրող Տաթեւ Խաչատրյանի աշխատանքը խոչընդոտելու գործով ամբաստանյալը «կորել է»

Երևանի Էրեբունի և Նուբարաշեն վարչական շրջանների ընդհանուր իրավասության դատարանում այսօր նշանակված էր «Հայկական ժամանակ» օրաթերթի լրագրող Տաթեւ Խաչատրյանի աշխատանքը խոչընդոտելու առթիվ հարուցված քրեական գործով առաջին դատական նիստը: Քանի որ նիստին չէին ներկայացել ամբաստանյալ Հայկ Հունանյանն ու մեղադրող դատախազ Ռաֆայել Երիցյանը, նիստը հետաձգվեց:

Դատարանը հետ էր ստացել նիստի օրվա և ժամի վերաբերյալ ծանուցագրի ծրարը, որն ուղարկվել էր ամբաստանյալ Հայկ Հունանյանին: Վերջինս, ըստ քրեական գործում առկա տվյալների, «Արարատբանկ» ԲԲԸ-ի աշխատակից է:

«Տեղափոխված է» գրությամբ դատարանը փոստային առաքման ծառայությունից հետ է ստացել նույն ծրարը: Ինչն է տեղափոխված կամ ով, ըստ դատավոր Վարդան Գրիգորյանի, հայտնի չէ:

Դատարանի աշխատակազմը փորձել է Հայկ Հունանյանի հետ կապ հաստատել նաև հեռախոսահամարով, որն առկա է քրեական գործում, սակայն տվյալ հեռախոսահամարն անհասանելի է, ուստի այս եղանակով ևս չի հաջողվել կապ հաստատել ամբաստանյալի հետ:

Քրեական գործը, հիշեցնենք, հարուցվել է  Էրեբունի վարչական շրջանում գտնվող թիվ 64 դպրոցի վարչական շենքում տեղի ունեցած միջադեպի առթիվ: Ըստ տուժող Խաչատրյանի ցուցմունքի՝ ինքն Ավագանու ընտրությունների օրը՝ մայիսի 14-ին, թիվ 64 դպրոցում, որտեղ գործել է  թիվ 10/29 ընտրատեղամասը, տեսանկարահանում իրականացնելիս է եղել, երբ մի երիտասարդ մոտեցել ու, ագրեսիվ վարքագիծ դրսևորելով, պահանջել է դադարեցնել տեսանկարահանումը: Ապա, ըստ Խաչատրյանի, տվյալ երիտասարդը փորձել է իր ձեռքից վերցնել հեռախոսը, որով ինքը տեսանկարահանում է իրականացնելիս եղել:

Երիտասարդին չի հաջողվել վերցնել լրագրողի հեռախոսն, ապա ընտրատեղամասում եղած դիտորդներից մեկը մոտեցել է ու նրան հեռացրել լրագրողից:

Հետո երիտասարդն, ով ինչպես հետագայում պարզվել է, ամբաստանյալ Հայկ Հունանյանն է եղել, փորձել է հեռանալ ընտրատեղամասից, և Տաթեւ Խաչատրյանը,  նրա ետևից գնալով, փորձել է պարզել նրա ինքնությունը:

«Ո՞վ ես, որ ներկայանամ»,- ըստ լրագրողի ցուցմունքի՝ ասել է Հունանյանն, ու ինքը պատասխանել է, որ լրագրող է: Այդ պահին լրագրողին չի հաջողվել պարզել իր աշխատանքը խոչընդոտած անձի ինքնությունը:

Հայկ Հունանյանը նախաքննության ընթացքում տված իր ցուցմունքում նշել է, թե չի իմացել, որ տեսանկարահանում իրականացնողը լրագրող է: Սա այն դեպքում, երբ Տաթեւ Խաչատրյանի պնդմամբ՝ իր աշխատանքը խոչընդոտած Հունանյանի համար իր` լրագրող լինելու հանգամանքը  ակնհայտ է եղել դեռևս մինչև իրեն մոտենալը:

Ըստ Խաչատրյանի՝ ինքը տեսանելի ձևով կրելիս է եղել  ինչպես «Հայկական ժամանակ»  օրաթերթի կողմից իրան տրված լրագրողական վկայականն, այնպես էլ Կենտրոնական ընտրական հանձնաժողովի կողմից տրված հավատարմագիրը:

Ամբաստանյալը պնդում է, թե ինքը Տաթեւ Խաչատրյանի «բեյջը» չի նկատել, մինչդեռ  բեյջի՝ տեսանելի լինելու հանգամանքը հաստատել  են գործով մի քանի վկաներ: «Բեյջի»՝ տեսանելի լինելու հանգամանքն, ըստ տուժող կողմի, ակնհայտ է նաև ընտրատեղամասում առկա տեսանկարահանող սարքի կողմից ֆիքսված տեսանյութում:

Ամբաստանյալ Հայկ Հունանյանը բացատրում է, որ բեյջը չի նկատել, քանի որ Տաթեւ Խաչատրյանի դեմքին է նայելիս եղել և փորձել  խուսափել նկարահավելուց:

Այս գործով հաջորդ դատական նիստը հուլիսի 18-ին է:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter