Հյուրանոցային տնտեսության օբյեկտների թիվն ավելի արագ է աճում, քան ոլորտի հասույթը. ԱՎԾ
2016 թվականի վերջի դրությամբ Հայաստանում գործում է հյուրանոցային տնտեսության 551 օբյեկտ։ Ինչպես նշված է ՀՀ ազգային վիճակագրական ծառայության զեկույցում (ԱՎԾ), այդ օբյեկտներից 302-ը գտնվում են Երևանում։
Հյուրանոցային տնտեսությունը ներառում է հյուրանոցները, առողջարանները, մոթելները, հյուրանոցատիպ հանգրվանները և այլն։ Թե դրանցից քանիսն են միայն հյուրանոցները, ԱՎԾ-ի ներկայացրած վիճակագրությունում չի առանձնացվում, սակայն ավելի վաղ մեր հոդվածներից մեկի շրջանակներում Զբոսաշրջության պետական կոմիտեից ստացված տեղեկությունների համաձայն, հյուրանոցների թիվը շուրջ 190 է, որից շուրջ 70-ը՝ Երևանում։
Ինչպես երևում է, զբոսաշրջության ոլորտի վիճակագրությունը վերանայվում է, քանի որ նախորդ տարի ցուցանիշներում որոշակի փոփոխություններ են արվել։
Հատկանշական է, որ վերջին երեք տարիներին, ըստ ԱՎԾ-ի, հյուրանոցային տնտեսության օբյեկտների թիվը զգալի աճել է`409-ից հասնելով 501-ի (աճը՝ 35%), այդ թվում Երևանում ՝ 229-ից հասնելով 302-ի (աճը՝ 32%)։
Ըստ ՀՀ ԱՎԾ տվյալների
Հյուրանոցային 551 օբյեկտները միասին ունեն ավելի քան 8900 համար, որից ավելի քան 8500-ը հյուրանոցային օգտագործման համար են, մնացածը՝ ոչ հյուրանոցային օգտագործման տրված համարները։ Ընդ որում, թե Երևանում, թե մարզերում գերիշխում են սովորական համարները, թվաքանակով երկրորդ տեղում կիսալյուքս համարներն են, երրորդում ՝ լյուքսերը։
Ուշագրավ է, որ հյուրանոցային տնտեսության օբյեկտները «սնկի պես» աճում են, սակայն ոլորտի ընդհանուր հասույթը, հատկապես մայրաքաղաքում, ցածր տեմպերով է աճում։ Նախորդ տարի ոլորտի ընդհանուր հասույթն, ըստ ԱՎԾ-ի, կազմել է մոտ 23 մլրդ դրամ, որը 2015 թվականի համեմատ աճել է մոտ 834 մլն դրամով կամ մոտ 4%-ով, մինչդեռ հյուրանոցային օբյեկտների թիվն այդ ընթացքում աճել է 16%-ով։ Սա նշանակում է, որ մեծամասամբ ավելացել են փոքր շրջանառություն ունեցող հյուրանոցային օբյեկտները։
Առանձին վերցրած՝ նույն պատկերն է նաև մայրաքաղաքում։ Նախորդ տարի Երևանում գտնվող հյուրանոցային օբյեկտների հասույթն, ըստ պաշտոնական վիճակագրության, կազմել է 18.6 մլրդ դրամ, որը մեկ տարում աճել է ընդամենը 0.09%-ով, մինչդեռ այդ ընթացքում հյուրանոցային տնտեսության օբյեկտների թիվն ավելացել է 10%-ով։
Ըստ ՀՀ ԱՎԾ տվյալների
Մեկնաբանություններ (1)
Մեկնաբանել