Չորեքշաբթի, 22 նոյեմբերի

Մանկապարտեզներում ամենաշատ խախտումներն Արարատի մարզում են, ամենաքիչը՝ Երևանում (ինֆոգրաֆիկա)



Սննդամթերքի անվտանգության պետական ծառայությունը 2013-2017թթ առաջին եռամսյակ ընկած ժամանակահատվածում երբևէիցե բողոքներ չի ստացել Երևանի և մարզերի մանկապարտեզների սննդի որակի վերաբերյալ։ Այնուամենայնիվ, նշված ժամանակահատվածում տուգանվել են 179 մանկապարտեզներ՝  մոտ 12 մլն ՀՀ դրամի:

«Հետք»-ն  ուսումնասիրել է այդ ժամանակահատվածում ՍԱՊԾ կատարած ստուգումները և պարզել, որ ամենաշատ խախտումները մանկապարտեզներում լինում է Արարատի մարզում, ամենաքիչը՝ Երևանում: Խախտումների մեծ մասն էլ վերաբերում է ստանդարտացման նորմատիվ փաստաթղթերի պահանջների, ինչպես նաև՝ մակնշումների խախտմանը։

 

Մանկապարտեզներում պետական վերահսկողությունը ՍԱՊԾ-ն իրականացնում է  ստուգումների և դիտարկումների միջոցով։ Մասնավորապես՝ «Ստուգումների կազմակերպման և անցկացման մասին», «Սննդամթերքի անվտանգության պետական վերահսկողության մասին» օրենքներով և 2013թ N 338-Ն որոշմամբ հաստատված «Հանրային սննդի կազմակերպությունների համար» ստուգաթերթի հարցերի շրջանակներում։

Նմուշառում և լաբորատոր փորձաքննություն իրականացվում է՝ ելնելով կոնկրետ դեպքերում եղած անհրաժեշտությունից։

Մանկապարտեզներում ՝ ՍԱՊԾ կողմից կատարվող ստուգումների հաճախականությունը սահմանված է «Ստուգումների կազմակերպման և անցկացման մասին» օրենքով, իսկ դիտարկումները կատարվում են՝ ըստ անհրաժշտության։

ՍԱՊԾ՝ «Հետք»-ին տրամադրած տեղեկության համաձայն՝ այս տարիների ընթացքում մանկապարտեզների սննդի որակի վերաբերյալ  երբևէ բողոքներ չեն ստացել:

2013-2017թթ առաջին եռամսյակի ընթացքում Երևանում և մարզերում իրականացված ստուգումների արդյունքում  խախտում է հայտնաբերվել 179 մանկապարտեզում:  Արդյունքում այդ մանկապարտեզների նկատմամբ կիրառվել է 12 030,000 մլն ՀՀ դրամի տուգանք։

 

3 խախտում Երևանում, 33 Արարատում

Մանկապարտեզներում 2013-2017թթ արձանագրված 179 դեպքից  միայն 3 են եղել Երևանում՝ «Երևանի թիվ 53 մանկապարտեզ»-ում, «Մանկիկ նախակրթարան»-ում  և «Ժպիտ նախակրթարան»-ում. մնացածը 176 խախտումը մարզերում է եղել:

Ամենաշատ խախտումները եղել են Արարատի մարզում՝ 33 դեպք, հաջորդն Արմավիրն է՝ 31 դեպք: Մարզերում ամենաքիչ խախտումը Վայոց Ձորում է, ընդամենը՝ 8 դեպք:

179 խախտում 183 տուգանք 

Նշված ժամանակահատվածում ՍԱՊԾ-ն տուգանել է 179 մանկապարտեզի՝ շուրջ 12 մլն ՀՀ դրամով: 
Նշանակված տուգանքներից նվազագույնը եղել է 20 000 դրամ, առավելագույնը՝ 150 000 դրամ:

Մասնավորապես արձանագրվել է 183 խախտում՝ «Վարչական իրավախախտումների վերաբերյալ ՀՀ օրենսգրքի» խախտման  3 հոդվածների մասով:

Խախտումների կեսում՝ 92 դեպքում, խախտվել են առևտրի իրականացման վայրի կազմակերպչի, առևտրի, հանրային սննդի վաճառողի եւ կենցաղային ծառայություններ կատարողի կողմից օրենքով սահմանված պահանջները ( ՎԻՎՕ 158-րդ հոդված): Սրա մեջ են մտնում նաև մանկշման խախտումներ, մասնավորապես՝ առանց պիտանիության ժամկետի, պիտանիության ժամկետն անցած, ոչ ընթեռնելի պիտանիության ժամկետով, պիտանիության ժամկետի կրկնակի մակնշմամբ, արտադրողի կողմից նշված բնօրինակ պիտանիության ժամկետը ջնջված և նոր ժամկետի նշումով, հայերեն մակնշումը արտադրողի կողմից նշված բնօրինակ պիտանիության ժամկետի վրա փակցված ապրանքները:

Մնացած 90-ում խախտվել են ստանդարտացման նորմատիվ փաստաթղթերի պարտադիր պահանջները, պարտադիր սերտիֆիկացման կանոնները, չափումների միասնականության ապահովման նորմատիվ փաստաթղթերի պահանջները ( ՎԻՎՕ 188-րդ հոդված): Մասնավորապես՝ սննդամթերքին առնչվող անհրաժեշտ փասթաթղթերի բացակայությունը, ինչպես նաև՝  եղած փաստաթղթերը չտրամադրելը:

Եվ 183 դեպքից միայն մեկում է արձանագրվել սանիտարահիգիենիկ նորմերի խախտում ( ՎԻՎՕ 112-րդ հոդված): Նման դեպք գրանցվել է Երևանի «Մանկիկ նախակրթարան»-ում. մանկապարտեզը տուգանվել է 150 000 դրամով:  


Գլխավոր էջ


Տես նաև՝

ավելին



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ