HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

«Սասնա ծռերը» դահլիճ բերվեցին, սակայն նորից 10 ժամով հեռացվեցին

Ամալյա Մարգարյան

«Սասնա ծռերի» 18 անդամների գործով նիստին դատավոր Արտուշ Գաբրիելյանը բավարարեց փաստաբաններ Երվանդ Վարոսյանի, Գրիշա Բալասանյանի և Դավիթ Գյուրջյանի միջնորդությունը և 16 ամբաստանյալներին նիստերի դահլիճ բերելու որոշում կայացրեց: Միջնորդությանը միացել էին նաև մյուս պաշտպանները: Դատավորը հրաժարվեց նաև հանրային պաշտպան ներգրավելու որոշումից, քանի որ գտավ, որ ամբաստանյալների ներկայության պարագայում հանրային պաշտպանի դիմելու կարիք չկա:

Հիշեցնենք, որ այսօր դատավորը հանրային պաշտպան ներգրավելու համար փաստաբանական պալատ դիմելու որոշում էր կայացրել, քանի որ փաստաբանների մի քանիսը չէին ներկայացել նիստերին, թեև ամբաստանյալներ Թորոս Թորոսյանը, Տիգրան Մանուկյանը և Թաթուլ Թամրազյանը իրենց պաշտպաններից չէին հրաժարվել:

Միջնորդություն ներկայացնելու ժամանակ դատավորը, դիմելով փաստաբաններին, հարցրեց` արդյոք ամբաստանյալներին տեղեկացրել են դատարանում կարգուկանոնի մասին:

Դատարանի հարցին ի պատասխան` փաստաբան Գրիշա Բալասանյանը ասաց. «Ես իրավունք չունեմ դաստիարակչական աշխատանք կատարել, դա իրենց դիրքորոշումն է: Դատարանը պետք է այնպիսի դիրքորոշում ցուցաբերի, որ գոնե դրա համար նիստերը չհետաձգվեն»:

Ընդմիջումից հետո դատարանը նորից սանկցիա կիրառեց ամբաստանյալների նկատմամբ` նախազգուշացման տեսքով:

Դավիթ Գյուրջյանը հայտարարությամբ հանդես եկավ և նշեց, որ «ըստ էության ապօրինի նիստին» անհնար է շարունակել մասնակցել և միջնորդեց նիստը հետաձգել:

Դատարանը շարունակեց ամբաստանյալների ինքնությունը ճշտելու գործողությանը:

Մարտիրոս Հակոբյանի ինքնությունը ճշտելու ժամանակ դատավորը պահանջեց, որ ամբաստանյալը ոտքի կանգնի, որին ի պատասխան` Մ. Հակոբյանը ասաց. «Էն բանի առաջ որ ապստամբում են, նրա առաջ չեն խոնարհվում»:

Վարդան Գերավետյանը ևս ոտքի չկանգնեց և փորձեց դատավորին ներկայացնել պատճառը:

«Դուք չեք ուզում պարզել` ինչի համար ես չեմ ուզում կանգնել», - ասաց Վ. Գերավետյանը: Թեև դատավորը թույլ չտցվեց շարունակել խոսքը, այնուամենայնիվ Գերավետյանը խոսեց և ասաց. «Ձեր աչքի առաջ, մեր տղաների նկատմամբ բռնություն է գործադրվում, և այդ բռնությունը գործադրվել է ժողովրդի հանդեպ»: Այս խոսքից հետո «Սասնա ծռերի» աջակիցները ծափահարություններով ողջունեցին հայտարարությունը:

Նիստը 15 րոպեով նորից ընդմիջվեց: Վերադառնալուց հետո ոտքի չկանգնելու համար ամբաստանյալների նկատմամբ` բացառությամբ Արամ Մանուկյանի, Հովհաննես Հարությունյանի  և Գևորկ Իրիցյանի, Արտուշ Գաբրելյանը նորից սանկցիա կիրառեց` 10 ժամով հեռացնելով նիստերից:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter