Արտակարգ իրավիճակների նախարարությունը տեղեկացնում է, որ Վայոց Ձոր մարզի Արտավան գյուղի հարակից անտառում օգոստոսի 10-ին բռնկված հրդեհի վտանգավոր օջախները մարվել են:

Օգոստոսի 13-ի դրությամբ դեպքի վայրում հերթապահություն էին իրականացնում Եղեգնաձորի հրշեջ-փրկարարական ջոկատից երկու մարտական հաշվարկ, Ջերմուկի հրշեջ-փրկարարական ջոկատից մեկ մարտական հաշվարկ, Վայքի հրշեջ-փրկարարական ջոկատից մեկ մարտական հաշվարկ, Մարզային փրկարարական վարչության օպերատիվ խումբը (5 փրկարար):

Հրդեհաշիջմանը մասնակցում են թվով 50 փրկարար, ինչպես նաև «Անտառտնտեսություն» ՊՈԱԿ-ից՝ 7, Բնապահպանության նախարարությունից՝ 4, մարզպետարանից՝ 2 աշխատակիցներ և հարակից գյուղերից 2 քաղաքացի:
Հրդեհաշիջումն իրականացվում է հինգ օջախներով:

Կիրակի` օգոստոսի 13-ին, ժամը 21:30-ի դրությամբ հրդեհաշիջման աշխատանքները մթության և վատ տեսանելիության պատճառով դադարեցվել են, կվերսկսեն վաղն առավոտյան: Տեղում հերթապահություն է իրականացնում երկու մարտական հաշվարկ (6 հրշեջ-փրկարար):

Հիշեցնենք, որ ԱԻՆ ճգնաժամային կառավարման ազգային կենտրոնում անձը չպարզված քաղաքացուց ահազանգ էր ստացվել, որ ՀՀ Վայոց ձորի մարզում՝ Արտավան գյուղում, այրվում է խոտածածկ տարածք:
Պարզվել էր, որ Մ-2 ավտոճանապարհի Վայք-Սարավան հատվածի 10-րդ կմ-ից դեպի Արտավան գյուղն ընկած տարածքում այրվում է խոտածածկույթ, բռնկվել է 14 էլեկտրասյուն, ինչի հետևանքով հոսանքազրկվել էր Արտավան գյուղը:
Առաջին անգամ հրդեհաշիջման համար օգտագործվել են մոտակա ջրամբարի պաշարները:
Հրդեհի (450-500 հա խոտածածկ և անտառածածկ (80 հա) տարածք) վտանգավոր օջախները հաջողվել է մարել՝ բացառելով հրդեհի հետագա տարածումը, տեղում աշխատող փրկարարները շարունակում են կրակի առավել մանր օջախների մարման աշխատանքները: