Չորեքշաբթի, 19 սեպտեմբերի

Լևոն Արոնյանը՝ Grand Chess Tour-ի արագ շախմատի մրցաշարի հաղթող



ԱՄՆ-ի Սենտ Լյուիս քաղաքում շարունակվում է Grand Chess Tour-ի 4-րդ մրցափուլը, որում արդեն ավարտվել է արագ շախմատի մրցաշարը: 18 հնարավորից վաստակելով 12 միավոր՝ մրցաշարի միանձնյա հաղթող է ճանաչվել հայկական շախմատի առաջատար Լևոն Արոնյանը:

34-ամյա շախմատիստը մրցաշարի վճռորոշ փուլում 7-րդ տուրում սև խաղաքարերով պարտության է մատնել ռուս Սերգեյ Կարյակինին, 8-րդ տուրում սպիտակներով ոչ-ոքի է խաղացել ամերիկացի Հիկարու Նակամուրայի հետ, իսկ արագ շախմատի վերջին՝ 9-րդ տուրում սևերով առավելության է հասել կուբացի գրոսմայստեր Լենիեր Դոմինգես Պերեսի նկատմամբ:

Ընդհանուր առմամբ արագ շախմատի ամբողջ մրցաշարի ընթացքում Արոնյանը տարել է 5 հաղթանակ, խաղացել է 2 ոչ-ոքի և կրել է ընդամենը 2 պարտություն:

Մրցաշարին մասնակցում է նաև շախմատի աշխարհի 13-րդ չեմպիոն, հայազգի Գարի Կասպարովը, ով հանդես է գալիս Ռուսաստանի դրոշի ներքո: Կարիերան վերսկսած 54-ամյա շախմատիստն ամբողջ մրցաշարի ընթացքում տարել է 1 հաղթանակ, խաղացել է 5 ոչ-ոքի և կրել է 3 պարտություն: Արդյունքում, Կասպարովը Դավիդ Նավարայի և Վիշվանաթան Անանդի հետ բաժանել է 8-10-րդ հորիզոնականները:

Այսօր և վաղը կկայանան կայծակնային շախմատի մրցաշարի պարտիաները, որոնց ավարտից հետո էլ հայտնի կդառնա Grand Chess Tour-ի 4-րդ մրցափուլի հաղթողի անունը:

Լուսանկարը՝ Grand Chess Tour-ի Twitter-ի էջից


Գլխավոր էջ



Մեկնաբանություններ (1)
1. Hayk18:28 - 17 օգոստոսի, 2017
Should be: Կարիերան վերսկսած 54-ամյա շախմատիստն ամբողջ մրցաշարի ընթացքում տարել է 1 հաղթանակ, խաղացել է 6 ոչ-ոքի և կրել է 2 պարտություն:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ