Ինչպես արդեն հայտնել էինք, Բորժոմի-Խարագաուլի ազգային պարկում երկու օր առաջ հրդեհ է բռնկվել:

Հայաստանի արտակարգ իրավիճակների նախարարությունը հայտնում է, որ նախնական տվյալներով՝ կրակն արդեն ոչնչացրել է շուրջ 5 հա բուսածածկ տարածք:

ՄԱԿ-ի մարդասիրական գործերի համակարգման գրասենյակի միջոցով (Virtual OSOCC ազդարարման համակարգ) Վրաստանի իշխանությունները օգնության հայտ են ներկայացրել միջազգային հանրությանը՝ Բորժոմիում բռնկված անտառային հրդեհի մարմանն աջակցելու խնդրանքով:

ԱԻՆ-ը տեղեկացնում է, որ նախագահի հրահանգով և վարչապետի համապատասխան հանձնարարությամբ՝ ՀՀ ԱԻ նախարարությունը ձեռնամուխ է եղել Վրաստանին աջակցությունը կազմակերպելու գործընթացին՝ հաշվի առնելով հրդեհի տարածքում առկա կրակի օջախներին մոտենալու ցամաքային ուղիների առկայությունը:

Օգոստոսի 22-ին, ժամը 16.30-ին ՀՀ ԱԻ նախարարությունից Վրաստան է ուղևորվել փրկարար ծառայության շարասյունը՝ 8 հրշեջ-փրկարարական և 1 փրկարարական ավտոմեքենա, Աղետների բժշկության կենտրոնի 1 մեքենա և շարժական կառավարման կետ (ընդհանուր՝ 57 հոգանոց անձնակազմով), որը դեպքի վայրում կծառայի որպես օպերատիվ գործողությունները համակարգող շտաբ:

լուսանկարը` gerogiatoday.ge-ից