ՈՒրբաթ, 22 սեպտեմբերի

Գյումրու քաղաքապետի դուստրն ու փեսան ընկերություն են գնել Պրահայում



Գյումրու քաղաքապետ Սամվել Բալասանյանի դուստրը՝ Ադելինա Բալասանյանը, ամուսնու հետ 2016 թ. Պրահայում ձեռք է բերել մի ընկերություն՝ դառնալով դրա փայատերն ու տնօրենը:

37-ամյա Ա. Բալասանյանը հոր եւ եղբայրներից Միսակի հետ գրանցված է նույն հասցեում՝ Գյումրու Թումանյան փողոցում: Իսկ ամուսինը՝ 40-ամյա Դավիթ Խաչիկի Սամվելյանը, հաշվառված է Երեւանում՝ Քանաքեռում:

2016-ի գարնանը ամուսինները ձեռք են բերել Պրահայում գրանցված «VRN GROUP Invest» ՍՊԸ-ն: Սամվելյանը դարձել է դրա 60, իսկ Բալասանյանը՝ 40 տոկոսի փայատեր: Միաժամանակ երկուսով գրանցվել են որպես տնօրեններ: ՍՊԸ-ի կանոնադրական կապիտալը 120.000 չեխական կրոն է (մոտ 5400 դոլար): Այն գրանցվել է դեռեւս 2015-ի փետրվարին, միանձնյա հիմնադիրը եղել է «REGISMASTER Group» ընկերությունը, որի ղեկավարը Յան Շաֆրան է: «VRN GROUP Invest»-ը հայ տերերը վերանվանել են Դավիթի ազգանունով՝ «SAMVELYAN»: Այդուհանդերձ, ընկերությունը փաստացի շարունակել է ղեկավարել Յան Շաֆրան, որին այդ հարցում լիազորել են: 2017-ի փետրվարին «SAMVELYAN»-ի հասցեն Պրահայի կենտրոնում գտնվող Ռեվոլուչնի փողոցից, որտեղ գրանցված են Շաֆրայի ընկերությունները, տեղափոխվել է Լիպովա 1444/20 շենք (Lípová 1444/20, Nové Město), որը նույնպես մայրաքաղաքի կենտրոնում է:

Նույն ընթացքում փոփոխություն է կատարվել նաեւ ՍՊԸ-ի գործունեության տեսակների մեջ: Անշարժ գույքի, բնակելի ու ոչ բնակելի տարածքների վարձակալությանը 2017-ից ավելացել է «հացաբուլկեղեն, հրուշակեղեն» տողը: Չի հստակեցվում՝ ընկերությունը տեղում զբաղվում է դրանց արտադրությա՞մբ, թե՞, օրինակ, ներմուծմամբ:

Սա շեշտում ենք, որովհետեւ Բալասանյանները Գյումրիում ունեն «Անուշարան» ՍՊԸ, որն արտադրում է հրուշակեղեն (ալյուրե եւ շաքարե, այսինքն՝ խմորեղեն եւ կոնֆետեղեն): Բացի դրանից՝ Ադելինա Բալասանյանը 2006-ին Երեւանում հիմնադրել է «Ուրարտու-Ադելինա» ՍՊԸ-ն, որը զբաղվում է հացի արտադրությամբ: Հավելենք, սակայն, որ, ըստ Չեխիայի վիճակագրական գրասենյակի, 2011-2017 թթ. Հայաստանից այդ երկիր ալյուրե ու շաքարե հրուշակեղեն կամ հացաբուլկեղեն չի ներկրվել:

Չեխիայի անշարժ գույքի կադաստրի տվյալներով էլ՝ ոչ «SAMVELYAN» ՍՊԸ-ն, ոչ էլ դրա սեփականատեր ամուսինները Պրահայում չունեն անշարժ գույք, ինչն, այդուհանդերձ, չի նշանակում, թե նրանք այնտեղ բիզնեսով չեն զբաղվում:

Իմանալու համար, թե իսկապես ինչի համար են Ադելինա Բալասանյանն ու Դավիթ Սամվելյանը ընկերություն գնել Չեխիայում, արդյոք նպատակն այդ երկրում անշարժ գույք ձեռք բերելն է (արտասահմանցիները Չեխիայում անշարժ գույք գնելու համար, որպես կանոն, ընկերություն են գրանցում կամ գնում, ինչը հետագայում հեշտացնում է նաեւ քաղաքացիություն ստանալու գործընթացը), իրականում ինչ գործունեություն է ծավալում ՍՊԸ-ն, հարցում էինք ուղարկել Գյումրու քաղաքապետին: Սամվել Բալասանյանի մամուլի քարտուղար Սոնա Առաքելյանը պատասխանել է, թե «հարցերը մի փոքր սխալ են հասցեագրված, դրանց պարզաբանման համար խնդրում ենք դիմել Սամվելյանների ընտանիքին»: Փաստորեն, քաղաքապետը չի ժխտել մեր ներկայացրած փաստը, պարզապես չի ցանկացել պատասխանել հարցերին, այնինչ դժվար թե չիմանար պատասխանները: 

Լիպովա 1444/20. հայերով՝ մեկ հարկի տակ

Հետաքրքիր է այն հասցեն, որտեղ նոր գրանցում է ստացել «SAMVELYAN» ՍՊԸ-ն: Լիպովա 1444/20 շենքը «հայկական» է: Այստեղ բնակարաններ ունեն երեւանյան «ՎՐՆ Ավիա» ընկերության (գործակալական ծառայություններ է մատուցում Հայաստանի, Ռուսաստանի, Չեխիայի օդային բեռնափոխադրումների ոլորտում) հիմնադիր Պարգեւ Վիրաբյանը, նրա դուստրերը՝ Լիանան եւ Նելլին՝ ամուսնու հետ: Վիրաբյանները նույնպես հաշվառված են Քանաքեռում՝ Դավիթ Սամվելյանի հարեւանությամբ, այսինքն՝ Գյումրու քաղաքապետի դուստրն ու փեսան իրենց ընկերությունը գրանցել են երեւանցի ծանոթների չեխական բնակարաններից մեկում: «SAMVELYAN»-ի նախորդ անունը՝ «VRN GROUP Invest», հուշում է, որ նախկինում էլ այն կապ է ունեցել Վիրաբյանների հետ, չնայած հիմնադիրը «REGISMASTER Group»-ն էր: Իրականում վերջինիս ղեկավար Յան Շաֆրան, Պարգեւ Վիրաբյանն ու նրա փեսան՝ Հարություն Հարությունյանը, բիզնես-գործընկերներ են:     

Լիպովա 1444/20-ում գրանցված են ոչ միայն Վիրաբյանների գերդաստանի ու Սամվելյան-Բալասանյան զույգի, այլեւ մի քանի հայ գործարարների ընկերություններ: 


Գլխավոր էջ


Տես նաև՝

ավելին



Մեկնաբանություններ (3)
1. aram07:47 - 29 օգոստոսի, 2017
Am I the only reader of the revelation of these scandalous news?
2. armo16:25 - 29 օգոստոսի, 2017
No, Aram you aren't, the majority of us is immune to this type of news. unfortunately
3. Mihran18:23 - 30 օգոստոսի, 2017
So, how much did they pay to purchase the company?
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ