Երևանի Կիևյան փողոցի թիվ 24 շենքի բնակիչները ահազանգում են շենքի դիմաց՝ ավտոտնակների հետևում գտնվող երկու չորացած բարդիների մասին, որոնք շրջվելու վտանգի առաջ են: Դրանք վտանգ են ներկայացնում տարածքի բնակիչների և շինությունների համար: Ինչպես երևում է գլխավոր նկարից, ծառերից մեկը նույնիսկ որոշ չափով թեքվել է:

Այս մասին «Հետք»-ին հայտնել է թիվ 24 շենքի բնակիչ Տիգրան Մանգասարյանը: Մեզ հետ զրույցում նա նշեց, որ արդեն 7 տարի է` իրենց հուզող հարցի մասին տեղեկացրել են Արաբկիր վարչական շրջանի ղեկավարությանը, սակայն դեռևս ոչ մի արդյունքի չեն հասել: Վարչական շրջանի ղեկավարությանը հասցեագրված առաջին նամակն ուղարկվել է 2010 թվականին շենքի համատիրության կողմից: Տեսնելով, որ ոչ մի փոփոխություն չկա` շենքի մի խումբ բնակիչներ իրենց անունից սկսել են պարբերաբար նամակներ ուղարկել: Վերջին նամակը բնակիչներն ուղարկել են 2017 թվականի հուլիս ամսին, սակայն գրությունը մինչև օրս անպատասխան է: Բնակիչները միտումնավոր ավելի մեծ տառաչափով են շարադրել նամակը՝ մտածելով, թե այդ կերպ կարող են ուշադրություն գրավել:

2017 թվականի մայիսի 2-ին Արաբկիր վարչական շրջանի ղեկավար Հովհաննես Վարդանյանին հասցեագրված հերթական նամակներից մեկին պատասխանել է նրա տեղակալ Արտակ Միսկարյանը: Որպես պատճառաբանություն՝ նշված է տեղանքի անհարմարությունը և համապատասխան տեխնիկայի բացակայությունը:

Բնակիչները սակայն, չեն ցանկանում սպասել, որովհետև մեծ է հավանականությունը, որ բարդիները կարող են ուժեղ քամուց շրջվել: Տիգրան Մանգասարյանը նշեց, որ փորձել են նույնիսկ սեփական միջոցներով վերացնել «օդում կախված վտանգը» և հատել 30-մետրանոց ծառերը, սակայն դա նրանց չի հաջողվել:

Մանգասարյանը պատմեց նաև, որ այս տարվա խորհրդարանական ընտրություններից առաջ վարչական շրջանի աշխատակազմի ներկայացուցիչներից երեք հոգի եկել են իրենց թաղամաս և խոստացել, որ անպայման կլուծեն այդ խնդիրը: Նրանց թվում է եղել նաև Արաբկիր վարչական շրջանի ղեկավարի տեղակալ Արտակ Միսկարյանը: Ընտրություններից հետո բնակիչները հետաքրքրվել են, թե ինչու չի կատարվել իրենց տրված խոստումը: Ի պատասխան՝ նրանց հասկացնել են տվել, որ իրենց շենքը «չի արդարացրել սպասելիքները»:

Թիվ 24 շենքի բնակիչների գլխավոր մտահոգությունն այն է, որ ծառերի շրջվելու դեպքում կարող են տուժել հավանական անկման տեղում խաղացող երեխաները: Ստորև ներկայացված նկարում պատկերված է այն տարածքը, որտեղ կարող են ընկնել չորացած ծառերը:

Բնակիչները դժգոհում են Արաբկիր վարչական շրջանի ղեկավարության անգործությունից: Նրանք նույն հարցով դիմել են նաև Երևանի քաղաքապետարանին, սակայն ստացել են նույնաբովանդակ պատասխան: