HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ոստիկաններն ու տեսուչները գնացել են Արդվի՝ հանքի համար փորված փոսը լցնելու հետքերով

Գայանե Սարգսյան

Արդվիում դեմ են գյուղի հարակից տարածքում ոսկի-բազմամետաղային հանքի գործարկմանը: Իրենց դեմ լինելը արդվեցիները վերջին ամիսներին արտահայտում են ամենատարբեր եղանակներով:

Որպես բողոքի ակցիայի շարունակություն երեկ արդվեցի ակտիվիստները բնապահպանների հետ միասին բարձրացել են գյուղին կից Շեկաղբյուրի  լեռնագագաթի լանջերն ու հողով լցրել այդ տարածքում հանքը գործարկել ցանկացող «Միռամ» ՍՊԸ-ի ներկայացուցիչների փորած մոտ 9 մետր երկարությամբ ու մինչև 3 մետր խորությամբ  փոսը:

Այս մասին լրատվամիջոցներով տեղեկատվություն տարածվեց երեկ երեկոյան: Գրեթե միաժամանակ տարածվեց նաև ԱԺ պատգամավոր Մանե Թանդիլյանի ելույթը, որում ներառվել էր արդվեցիների բաց նամակը՝ հանքի գործարկումը չթույլատրելու վերաբերյալ:

«Ընկերությունը ապօրինաբար քանդել ու մի քանի մեքենա հումք է տեղափոխել այդ տարածքից, որի հետևանքները գյուղացիները ստիպված են եղել վերացնել սեփական նախաձեռնությամբ՝ էքսկավատորներով քանդածը ձեռքով հարթեցնելու միջոցով: Դա կատարվել է հենց այսօր»,- ասել էր պատգամավորը:

Այսօր առավոտյան արդեն ՀՀ բնապահպանության նախարարության  բնապահպանության ու ընդերքի տեսչական մարմնի աշխատակիցներն ու ոստիկանության Թումանյանի բաժնի տեսուչները վերադասների կողմից Արդվի մեկնելու ու տեղում առկա իրավիճակին ծանոթանալու հանձնարական են ստացել:

Նրանք նախ Արդվիի գյուղապետարանում հանդիպեցին համայնքապետ Սամվել Կիրակոսյանի ու աշխատակազմի անդամների, ապա նաև նրանց այցի մասին տեղեկացած ու գյուղապետարան շտապած արդվեցիների հետ:

Հարցադրումներին՝ ո՞վքեր են լցրել փոսը, տեխնիկա աշխատե՞լ է, թե ՝ ոչ, արդվեցիները հակադարձեցին՝ իսկ ինչո՞ւ չեք հետաքրքրվում, թե ովքեր են փորել փոսը:

Ծավալվեց ակտիվ քննարկում-բանավեճ տեսչության ներկայացուցիչների ու արդվեցիների միջև: Գյուղապետարանի ներսում քննարկումից զատ գյուղացիներն իրենց դժգոհության ձայնն էին բարձրացրել նաև բակում:

«Մենք վարչապետին նամակ էինք գրել,  նամակը ստացել ա, թող էսօրվա պես հանձնարարեր, գային էդ փոսը նայեին: Սա մեր գեղն ա, մեր պապերից հասած ժառանգություն ա, մենք պահում ենք մեր գեղը: Մեր գեղն ա, մենք ասում ենք մի քանդեք մեր գեղը»,- վրդովվում է գյուղացիներից մեկը:

«Ընդերքը անխնա թալանում են, սերունդների մասին մտածող չկա բացարձակ: Հրեն մեր հարևան Մղարթում ավիրել են, մի կով չի կարա արածի: Սա խայտառակ վիճակ ա, սա ճիշտ բան չի: Մերը հիմնականում անասնապահությունն ա, եթե մեր հանդերը ավիրեցին, մենք ի՞նչ ենք անելու»,- ասում է արդվեցի Վաչագան Աթաբեկյանը:

Որոշ ժամանակ անց բնապահպանության նախարարության  բնապահպանության ու ընդերքի տեսչական մարմնի աշխատակից Արմեն Ղարագյոզյանը հեռախոսով ինչ-որ մեկի հետ խորհրդակցելուց հետո տեղեկացրեց, որ անհրաժեշտություն կա բարձրանալ Շեկաղբյուր հանդամաս ու տեղում ուսումնասիրել փոսալցված հատվածը:

Լրագրողների ու գյուղի ակտիվիստներից երկուսի ուղեկցությամբ գյուղ եկած տեսուչները բարձրացան լեռն ի վեր: Տեղում չափումներ իրականացնելուց հետո տեսուչներն արձանագրեցին, որ փորված փոսի երկարությունը 9 մետր է, խորությունը՝ մինչև 3 մետր, լայնությունը՝ 50 սմ:

«Փոսի մասին առաջին բարձրաձայնումը եղել է հունիսի 28-ին, սակայն ոչ ոք չի արձագանքել»,- ասում է արդվեցի Սուրեն Կիրակոսյանը, զարմանալով, որ պաշտոնական արձագանք ստանում են միայն այսօր՝ փոսը լցնելուց հետո:

Գյուղապետարան վերադառնալով տեսուչներն ուսումնասիրությանը մասնակցած արդվեցիների հետ համատեղ արձանագրութուն կազմեցին՝ հիմք ընդունելով տեսածն ու արդվեցիների պատմածները:

Տեղում աշխատող լրագրողներին համայնքապետ Սամվել Կիրակոսյանը  առաջարկեց.

«Աղմուկը աշխատեք քչացնել, մենք ավելի կարևոր աշխատանքներ ունենք: Ոչ մի բան էլ չի կատարվում: Երկու-երեք մետր ա, ձեռքով փորված ա, հիմա արձանագրությունը կկազմվի, ամեն ինչն էլ դադարեցված ա: Օրենքի սահմաններում պատասխանել ենք մարդկանց, որ ժողովուրդը, ավագանին բոլորը դեմ են, ոչ մի բան էլ չի արվելու, էդ աշխատանքները չի կատարվելու: Մեր տարբեր զրույցների ժամանակ նշվել է, որ տուրիզմի, պատմամշկութային արժեք ունեցող... էդ ամենը բերում է էն բանին, որ էդ հանքը չի կարող շահագործվի... Պետք չի սենց աղմուկներ բարձրացնել»:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter