«Արոյան»-ը մտադիր է ոսկերչության ոլորտում 11 մլն դոլարի ներդրում կատարել
«Արոյան» ընկերությունն այսուհետ գործունեություն կծավալի «Մերիդիան» ազատ տնտեսական գոտում։ Գործադիրը այս որոշումը ընդունեց այսօրվա նիստին՝ տնտեսական զարգացման և ներդրումների նախարար Սուրեն Կարայանի առաջարկով։
Ընկերությանը շահագործողի թույլտվություն տրվեց՝ ոսկերչության ոլորտում գործունեություն իրականացնելու համար:
«Արոյան»-ի գործողության ժամկետը սահմանվել է 8 տարի, որի ընթացքում ընկերության ներդրումների ծավալը, ըստ որոշման նախագծի, կհասցվի 11 մլն դոլարի, իսկ արտադրանքի արտահանման տարեկան ծավալը՝ մոտ 2,5 մլն դոլարի:
Ընկերությունը պլանավորում է արտահանում իրականացել դեպի Ռուսաստանի Դաշնություն, Ղազախստան, Արաբական Միացյալ Էմիրություններ, Քաթար, Բահրեյն, Քուվեյթ, Օման:
«Արոյան»-ը մտադիր է մոտակա 8 տարվա ընթացքում աշխատատեղերի թիվը հասցնել 100-ի` 300 դոլար միջին աշխատավարձով։
«Արոյան»-ը նորաբաց ընկերություն է։ Իրավաբանական անձանց պետական ռեգիստրի տվյալներով՝ ընկերությունը հիմնադրվել է այս տարվա հունիս ամսին։
Հիշեցնենք, որ «Մերիդիան» ազատ տնտեսական գոտին գործարկվել է 2015 թվականի մարտի 12-ի կառավարության որոշմամբ։
Մեկնաբանել