Կառավարությունը 350 միլիոն դրամ կհատկացնի ՏԻՄ ընտրությունների համար
2017 թվականի նոյեմբերի 5-ին կայանալիք տեղական ինքնակառավարման մարմինների ընտրությունների նախապատրաստման և անցկացման ծախսերը ֆինանսավորելու համար կառավարության պահուստային ֆոնդից կենտրոնական ընտրական հանձնաժողովին կհատկացվի 350 միլիոն դրամ։
Կառավարությունը այսօրվա նիստում հավանության արժանացրեց տարածքային կառավարման և զարգացման նախարար Դավիթ Լոքյանի ներկայացրած որոշման այս նախագիծը։
Ինչպես գրված է որոշման նախագծում՝ 64 համայնքում կայանալու է ՏԻՄ ընտրություն, այն կազմակերպելու և անցկացնելու է 24 տարածքային ընտրական հանձնաժողով, ձևավորվելու է 510 տեղամասային ընտրական հանձնաժողով, տպագրվելու է 885.000 քվեաթերթիկ: Այս աշխատանքների իրականացման համար անհրաժեշտ է 744 միլիոն դրամ, սակայն տեղական ինքնակառավարման մարմինների ընտրությունների համար հատկացված գումարի մնացորդը 394 միլիոն դրամ է։ Ընտրությունների կազմակերպման համար պահանջվում է ևս 350 միլիոն դրամ, որն էլ այսօրվա որոշմամբ կառավարությունը կտրամադրի։
Նիստի մեկ այլ որոշմամբ` 22 միլիոն դրամ էլ կհատկացվի Գորիսի համայնքի ղեկավարի ընտրությանը։
Ինչպես արդեն հայտնել էինք՝ սեպտեմբերի 8-ին Գորիս համայնքի ղեկավար Վաչագան Ադունցը հրաժարական է ներկայացրել: Սեպտեմբերի 11-ին համայնքի ավագանին կազմել է համայնքի ղեկավարի լիազորությունները վաղաժամկետ դադարեցնելու մասին արձանագրություն և ներկայացրել տարածքային կառավարման և զարգացման նախարարություն:
Նոյեմբերի 5-ին կայանալիք համայնքի ղեկավարի արտահերթ ընտրությունների նախապատրաստման և անցկացման ծախսերը ֆինանսավորելու համար Կենտրոնական ընտրական հանձնաժողովին կհատկացվի 20 միլիոն դամ, իսկ ոստիկանությանը՝ 2.2 միլիոն դրամ։ Գումարը կրկին կտրամադրվի կառավարության պահուստային ֆոնդից։
Մեկնաբանել