Երեքշաբթի, 25 սեպտեմբերի

«Զինված խմբին» զենք իրացնելու գործով անցնող անձինք դատարանում հրաժարվում են ցուցմունքներ տալուց



Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում Վահան Շիրխանյանի և մյուսների վերաբերյալ դատական նիստը սկսվեց շուրջ 45 րոպե ուշացմամբ:

Ժամը 11-ին նշանակված դատական նիստից առաջ դեռևս դատարան չէին ներկայացել  որոշ փաստաբաններ ու մեղադրող դատախազները: Մեր տեղեկություններով` դահլիճ չէր գալիս նաև ամբաստանյալ Խաչիկ Ավետիսյանը, ով ամբաստանյալներից ամենավերջինը եկավ դահլիճ:

Ավետիսյանը նախորդ դատական նիստին հայտարարել էր, որ որպես բողոքի նշան այսօր կայանալիք դատին  չի ներկայանալու: Նա դժհոգում էր, որ իրեն  չեն թույլատրում տեսակցել երկու տարեկան թոռնիկի հետ: Այս գործով անցնող ազատամարտիկներից 10-ը թոռ ունեն: Դատարանը վերացրել է ամբաստանյալների տեսակցությունների արգելանքը միայն ծնողների, ամուսնու և երեխաների մասով, և կալանավորված անձինք այս պահին զրկված են իրենց թոռնիկներին տեսակցելու հնարավորությունից:

Դատավոր Բեկթաշյանի խոսքից այսօր պարզ դարձավ, որ նա մտադիր է  թույլատրել, որպեսզի ամբաստանյալները տեսակցեն իրենց թոռնիկներին, պարզապես դրա համար դեռևս որոշ փաստաթղթեր են պետք:

Այսօր ցուցմունք տալու համար դատարան էին  հրավիրվել այս գործից անջատված մասով անցնող անձինք՝ Հարություն Հովհաննիսյանը, Ստեփան Չիլինգարյանը և մեկ վկա` Իլիչ Թադևոսյանը, ով անջատված մասով անցնող ամբաստանյալ Մարատ Թադևոսյանի որդին է:

Հարություն Հովհաննիսյանն ու Ստեփան Չիլինգարյանը մեղադրվել են զենք վաճառելու մեջ, դատապարտվել 1 տարի 6 ամիս ժամկետով ազատազրկման և այժմ արդեն ազատության մեջ են: Նրանք դատարանում հրաժարվեցին ցուցմունք տալ, և նման պայմաններում հրապարակվեցին նրանց նախաքննական ցուցմունքները:

Հարություն Հովհաննիսյանը կասկածյալի, ինչպես նաև մեղադրյալի կարգավիճակում մի քանի անգամ հրաժարվել է ցուցմունքներ տալ, ապա ավելի ուշ մանրամասներ է հայտնել:

Ըստ Հովհաննիսյանի ցուցմունքի՝ ինքը հանգուցյալ հոր ավտոտնակից զենք-զինամթերք է գտել, սակայն վախեցել է այն հանձնել ոստիկաններին:

Երբ անջատված մասով անցնող գործով դատապարտված Անուշավան Ավետիսյանն իրեն հայտնել է զենք գնելու մտադրության մասին, ինքը որոշել է վաճառել ավտոտնակում գտածն  ու վաճառել է:

Հովհաննիսյանի ցուցմունքի համաձայն` ինքը չի իմացել, որ զենքը-զինամթերքը նախատեսված է եղել զինված հեղաշրջում կատարելու համար, վաճառել է, որպեսզի ազատվի դրանցից: Ընդհանուր առմամբ` Հովհաննիսյանն, ըստ իր վերաբերյալ դատավճռի, Անուշավան Ավետիսյանին վաճառել է  900 ԱՄՆ դոլարի զենք:

Դատապարտյալ Ստեփան Չիլինգարյանն, ըստ իր վերաբերյալ դատավճռի,  Անուշավան Ավետիսյանին վաճառել է 4700 ԱՄՆ դոլարի զենք-զինամթերք: Այս դատապարտյալն էլ, ըստ իր ցուցմունքների, հանգուցյալ պապի զենքերն է գտել ու վաճառել:

Նախաքննական իր ցուցմուքներից մեկում Չիլինգարյանը նշել է, թե զենք-զինամթերքը գտնելուց հետո այն թողել է նկուղում՝ որպես պապից հիշատակ:

Հետագայում Անուշավան Ավետիսյանն, ըստ Չիլինգարյանի ցուցմունքի, իրենից հետաքրքրվել է, թե արդյոք «պապից մնացած զենք չունի»՝ խոստանալով որ եթե ունի, և դրանք լավ վիճակում են, ինքը կգնի դրանք: Այսպիսով, հանգուցյալ պապից մնացած հիշատակը Չիլինգարյանը որոշել է վաճառել 4700 ԱՄՆ դոլարով:

Չիլինգարյանի խոսքով՝ ինքը զինված խմբի պարագլուխ համարվող Արթուր Վարդանյանին չի ճանաչում, նրա մասին միայն հեռուստացույցով է իմացել, և հետո Գյումրիում տարածված խոսակցություններից  տեղեկացրել է, որ Անուշավան Ավետիսյանը ևս կապ է ունեցել այդ խմբի հետ:

Այսպիսով, կարելի է արձանագրել, որ այս գործից անջատված մասով անցնող անձինք դատարանում հրաժարվում են ցուցմունքներ տալ, և հրապարակվում են նրանց նախաքննական ցուցմուքները, ինչի հետևանքով ամբաստանյալները զրկվում են հակընդդեմ հարցման հնարավորությունից:

Դատարանում հարցաքննված վկա Իլիչ Թադևոսյանը գործից անջատված մասով անցնող մեղադրյալ Մարատ Թադևոսյանի որդին է: Վերջինս, ըստ մեղադրանքի, զենք է տվել զինված խմբին: Այդ վկան դատարանին պատմել է, որ լսել է, թե ինչպես են  Արթուր Վարդանյանն ու հայրը հեռախոսով խոսում իրար հետ, և հասկացել է, որ հայրը պատրաստվում է մեկնել Քեսաբ: Դրանից հետո, ըստ վկայի ցուցմունքի, ինքը զանգահարել է Արթուր Վարդանյանին ու ասել, որ ինքը չի ցանկանում, որ իր ազատամարտիկ հայրը մեկնի  Քեսաբ, և Վարդանյանը նրա հետ կոպիտ է խոսել ու նշել, թե ինքը «100 գործ ունի և չունի Իշխան Թադևոսյանի ժամանակը»:

Այս վկան, ըստ էության, այլ հանգամանքի մասին չխոսեց դատարանում: Արթուր Վարդանյանը նրան մի քանի հարց տվեց՝ փորձելով հստակեցնել, որ ոչ թե ինքն է զանգահարել Իշխան Թադևոսյանին, այլ Թադևոսյանն՝ իրեն, այն դեպքում, երբ վկան հենց այդպես էլ ասում էր: Վարդանյանն ակնհայտ բացասական վերաբերմունք ուներ Թադևոսյանի նկատմամբ:

Նշենք,  որ այսօր դատական նիստի ընթացքում ամբաստանյալ Վահան Շիրխանյանի առողջական վիճակը վատացել էր: Նրա համար դատարանը շտապօգնություն հրավիրեց: Ինչպես մեզ հայտնի դարձավ, դատարանի դահլիճ եկած շատպօգնության աշխատակիցները բուժօգնություն էին ցույց տվել ոչ միայն Շիրխանյանին, այլև ամբստանյալներ Անտոն Դիկրան Թոթոնջյանին և Հարություն Սարիբեկյանին, որոնք ևս առողջական խնդիրներ ունեին:

Դատական նիստն այսօր հետաձգվեց: Հաջորդ նիստը տեղի կունենա սեպտեմբերի 29-ին:

 


Գլխավոր էջ



Մեկնաբանություններ (1)
1. Վարազ Սյունի 20:24 - 22 սեպտեմբերի, 2017
Արթուր Վարդանյանն ինձ վրա բավականին հայրենասեր տղայի տպավորություն թողեց: Մեղադրող կողմից ես համոզիչ ապացույցներ մինչև հիմա դեռ չեմ տեսել. մեղադրանքների մեծագույն մասը բակային բամբասանքների մակարդակի է: ՀՀ Ոստիկանությունն ու ԱԱԾ-ն միայն սեփակա՛ն ժողովրդին ջարդել գիտեն: Պերմյակովի գործի ժամանակ չգիտես ուր էին: Հայաստանի դատաիրավական համակարգը անկախ չէ,որ մարդ հաստատ իմանա: Հնարավոր է նաև,որ մարդկանց գլխին սարքում են: Ոստիկանությունն ու ԱԱԾ-ն «սարքել-թքել-կպցնելու» մեծ վարպետներ են. Սովետից մնացած հիվանդություն է: ԱԱԾ-ն իբր գործ է անում:Թուրքական «գորշ գայլերի» ղեկավարներն եկան Երևանի կենտրոնում նկարվեցին ու նույնիսկ կաթողիկոսարան գնացին,բայց ԱԱԾ-ն քնած էր:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ