Կառավարությունը այսօրվա նիստում որոշեց իր պահուստային ֆոնդից «Երևան» հիմնադրամին տրամադրել 20 միլիոն դրամ՝ Աջափնյակ վարչական շրջանի «Նորաշեն» 16-րդ թաղամասի 5 բնակելի շենքերի գազաֆիկացման աշխատանքներին աջակցելու նպատակով։

Ինչպես ասվում է տարածքային կառավարման եւ զարգացման նախարար Դավիթ Լոքյանի ներկայացրած որոշման նախագծում, Երևանում գրեթե բոլոր բնակելի շենքերը և թաղամասերը գազաֆիկացված են՝ բացառությամբ այս հինգ շենքի:

Այս շենքերում 600 բնակարան կա, այնտեղ բնակվում է շուրջ 2000 բնակիչ: Քաղաքապետարանը «Գազպրոմ Արմենիա» ՓԲԸ-ի հետ համատեղ ուսումնասիրել է շենքերի գազաֆիկացման աշխատանքների իրականացման հնարավորությունները։ Արդյունքում հայտնել են, որ շենքերն անհրաժեշտ է հարմարեցնել գազաֆիկացման աշխատանքների իրականացման համապատասխան պայմաններին, ինչը յուրաքանչյուր շենքի հաշվով կազմում է 4 միլիոն դրամ:

Այս գումարի հատկացման և աշխատանքերի իրականացման որպես ակնկալվող արդյունք նշվում է՝  Երևան քաղաքում չգազաֆիկացված շենքեր չեն լինի: