Մեծավանից նմուշառված ջրում հայտնաբերվել է դիզենտերիայի հարուցիչ. վարակվածների թիվը հասնում է 30-ի
Գայանե Սարգսյան
Մեծավանի բնակչուհի Լիլիթ Խանաղյանին հանդիպեցինք Լոռու մարզի Տաշիրի բժշկական կենտրոնում: Երիտասարդ մայրիկը մոտ մեկ շաբաթ է` ստացիոնար բուժում է ստանում կենտրոնի ինֆեկցիոն բաժանմունքում: Պատճառը գյուղում տարածված հիվանդությունն է. սեպտեմբերի 19-ին Մեծավանում գրանցվել է դիզենտերիայի առաջին դեպքը:
Դեպքը, սակայն, միակը չի եղել: Մեկ շաբաթվա ընթացքում հիվանդությանը բնորոշ ախտանշաններով նախ Մեծավանի առողջության առաջնային պահպանման կենտրոն, ապա Տաշիրի բժշկական կենտրոն է տեղափոխվել 15 մարդ:
Տեղափոխվածներից ամենակրտսերը եղել է 1, ամենավագը՝ 74 տարեկան: Հիվանդացածների մեջ մեծ թիվ են կազմել հատկապես երեխաները: Եղել են դեպքեր, երբ գրեթե միաժամանակ հիվանդացել են նույն ընտանիքի մի քանի անդամներ:
Դեպքերի հետ կապված ահազանգ է ստացվել նաև հիվանդությունների կանխարգելման ու վերահսկման ազգային կենտրոնի Լոռու մասնաճյուղում, որի աշխատակիցներն անմիջապես մեկնել են Մեծավան, կատարել համապատասխան նմուշառումներ: Կատարված համաճարակաբանական հետազոտությունների արդյունքում պարզվել է, որ Մեծավանի ջրի ներքին ցանցից վերցված նմուշառման ջուրը չի համապատասխանում խմելու ջրի սանիտարական կանոններին ու նորմերին, հետևաբար` այն խմելու համար պիտանի չէ:
Մասնաճյուղի աշխատակիցները Մեծավանում կատարվել են տնայցեր, որոնց ընթացքում հայտնաբերվել է ևս 15 հիվանդ, ովքեր ամբուլատոր բուժում են ստացել գյուղի առողջության առաջնային պահպանման կենտրոնում:
«Այդ ջուրը պետք է չխմվեր: Ջրի մեջ հայտնաբերվել է շիգելա՝ դիզենտերիայի հարուցիչը»,- մեզ հետ զրույցի ընթացքում հաստատեց հիվանդությունների կանխարգելման ու վերահսկման ազգային կենտրոնի Լոռու մասնաճյուղի տնօրեն Անժելա Հովհաննիսյանը:
Վերջինիս խոսքով վարակի պատճառը եղել է ջրի ներքին ցանցի կեղտոտվածությունը: Գյուղ մեկնած աշխատանքային խմբի կողմից տեղում կատարվել է ջրի ներքին ցանցի գերքլորացում՝ խողովակների մաքրման համար: Ա. Հովհաննիսյանի հավաստմամբ՝ մաքրման աշխատանքներից հետո կատարված կրկնակի հետազոտության արդյունքերով ջուրը մաքուր է եղել:
Ա. Հովհաննիսյանը նշում է, որ վարակի նոր դեպքերը բացառելու համար Մեծավանի համայնքապետին առաջարկվել է պարբերաբար ախտահանման ու քլորացման աշխատանքներ իրականացնել, ինչը մինչ հիվանդության բռնկումը չի կատարվել:
Տաշիրի բժշկական կենտրոնի փոխտնօրենը վերջին տարիներին դեզինտերիայի բռնկման դեպք չի հիշում: Ասում է՝ վերջին 5-6 տարիներին նման բռնկում չեն ունեցել:
Մեկնաբանել