HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

«Պիտի գաս հաղթելու համար. հնարավոր չէ հաղթել առանց նպատակի»

Ամալյա Մարգարյան

«Դժվար էր այստեղ հասնելը, տաքսու վարորդները հրաժարվում էին Գյումրիից հեծանիվը Երևան տեղափոխել, հետո մեկին գտանք, ով համաձայնեց: Առավոտ շուտ հասանք Երևան»,- ասում է Անդրանիկ Ներսիսյանը, ով, 250 կմ ճանապարհ կտրելով, հասել է Նոյեմբերյան՝ մասնակցելու սիրողական հեծանվասպորտի մարզային 7-րդ գավաթին:   

Սիրողական հեծանվասպորտի մարզային գավաթի մրցաշարն այս տարի անցակցվում է Տավուշի մարզի Նոյեմբերյանի Սրբասար (տեղացիների լեզվով՝ Գոգդաղ) կոչվող վայրում: Անդրանիկի ընկերը՝ Կառլենը, ասում է, որ մրցաշարին ներկայանալու համար Գյումրիի օրվան նվիրված միջոցառումներին հրաժարվել է մասնակցել և ընտրել է Սրբասարի ճանապարհը:

«Մեր նպատակն է Նոյեմբերյանում առկա տեսարժան վայրերը, բնությունը հասանելի դարձնել, ցույց տալ ոչ միայն հայերին, այլ նաև արտասահմանցի հյուրերին»,- ասում է «Նոյեմբերյանի տուրիզմի կենտրոն» ՀԿ-ի նախագահ Նունե Ազիզյանը, ով միջոցառման կազմակերպիչներից է:  

Նունեն նշում է, որ հետագայում էլ միջոցառումներ կկազմակերպեն. «Սա միջոց է, որ երեխաները, երիտասարդները մնան Նոյեմբերյանում, այլ ոչ թե գլուխներն ազատեն սահմանամերձ բնակավայրից»:

Իսկ Նոյեմբերյանի համայնքապետի օգնական Արմեն Ամիրաղյանը նշում է, որ մրցաշարը հաջողված սկիզբ է տուրիզմի զարգացման համար.

«Թեև եղանակն անձրևոտ էր, բայց, ամեն դեպքում, միջոցառումը կայացավ: Նոյեմբերյանը գտնվում է ճանապարհային խաչմերուկում, և այսպիսի միջոցառումները շատ կարևոր են: «Սրբասար 2017»-ը հենց այդպիսի միջոցառումների սկիզբն էր»:

Հեծանվորդները պատմում են, որ հասցրել են մասնակցել Դիլիջանում, Արտավանում, Ենոքավանում, Ղարաբաղում ընթացող մրցաշարերին: Նրանք կատակում են և իրար մեջ բաժանում մրցույթային տեղերը:

Արդեն 7-րդ անգամ գավաթը նվաճած Արա Սարգսյանը ասում է, որ մասնակիցները սիրողական մակարդակում են զբաղվում հեծանվասպորտով, ունեն տարբեր մասնագիտություններ.

«Էստեղ հեծանիվից է կախված հաղթանակը»,- կատակում է Արան, հետո ավելացնում, որ ում հեծանիվն ավելի թանկարժեք է, նա էլ կհաղթի:  Արան ասում է, որ մրցելու համար նաև պետք է փորձ ունենալ. «Պիտի գաս հաղթելու համար. հնարավոր չէ հաղթել առանց նպատակի: Չես կարող ուղղակի գալ ու հաղթել, մարզվելը ևս կարևոր է»:

Իսկ ընկերներն էլ կատակում են, որ երբ տեսնում են՝ Արան մասնակցում է, առաջին տեղի համար էլ չեն պայքարում:

«Մրցույթից դուրս էլ մենք հանդիպում ենք, մինչև այստեղ գալը Վրաստան ենք գնացել, սահմանը հեծանիվներով հատել, հետո մեր վրացի ընկերների հետ վերադարձել Հայաստան»,- ասում է Յուրա Առաքելյանը, հետո ավելացնում, որ հեծանվային սպորտն իրենց համար արդեն ապրելակերպ է դարձել:

Մասնակիցներն անգամ եղանակային վատ պայմանների մասին են կատակում. «Ասում են՝ ցեխը նպաստում է առողջությանը, մենք հեծանիվ քշելու համար չենք եկել, ցեխի համար ենք եկել»,- ասում է մասնակիցներից Արման Հակոբյանը:

Միջոցառման վերջում «Սիրողական հեծանվասպորտի և հեծանվային զբոսաշրջության» ֆեդերացիայի նախագահ Արման Անտոնյանը, հաղթողներին հանձնելով մրցանակներն ու պատվոգրերը, նշում է, որ հեռավոր մարզեր գալու և մրցումներ անցկացնելու նպատակը համայնքների տեսարժան վայրերը ցույց տալն է և առողջ ապրելակերպը տարածելը.

«Մրցաշարում տարիքային սահմանափակում չկա: Այս տարի մասնակցում էին 14-50 տարեկան հեծանվորդներ: Ողջունելի է, որ 5 մասնակից ունեինք Նոյեմբերյանից: Հույս ունենք ամեն տարի այստեղ կրկնել մրցաշարը և ունենալ ավելի շատ մասնակիցներ»:

 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter