«Նաիրիտ» գործարանի աշխատակիցներն այսօր բողոքի ակցիա կիրականացնեն նախ նախագահական նստավայրի, ապա խորհրդարանի դիմաց՝ գործարանի վերագործարկման պահանջով։

Ակցիայի մասնակիցներից Կարինե Շահվերդյանը «Հետք»-ին հայտնեց, որ այս ընթացքում հանդիպումներ են ունեցել թե՛ «Ելք», թե՛ «Ծառուկյան դաշինք» խորհրդարանական խմբակցությունների պատգամավորների հետ, իսկ այսօր էլ 13.30-ին պատգամավորների հետ հանդիպում են ակնկալում խորհրդարանի դիմաց։

Մեր զրուցակցի խոսքով՝ ակցիայի ժամանակը պայմանավորված է նրանով, որ այսօր ԱԺ-Կառավարություն հարց ու պատասխանի օրն է, և պատգամավորները հարցեր են ուղղելու Կառավարությանը։

Հիշեցնենք, որ 2015 թվականի նոյեմբերի 30-ին Շենգավիթ վարչական շրջանի ընդհանուր իրավասության դատարանը բավարարել է «Հայաստանի էլեկտրական ցանցեր» ընկերության դիմումը՝ սնանկ ճանաչելով ՀԷՑ-ի պարտապան «Նաիրիտ գործարան» ՓԲԸ-ին։