Հինգշաբթի, 19 հոկտեմբերի

«Արմավիր» ՔԿՀ-ի պետը 8 միլիոն դրամից ավելի արժողության ոսկյա զարդեր ունի



«Արմավիր» քրեակատարողական հիմնարկի պետ Տիգրան Նավասարդյանը ոսկյա զարդերի սիրահար է:   Տիգրան Նավասարդյանը բարձրաստիճան պաշտոնատար անձանց էթիկայի հանձնաժողով ներկայացրել է այն գույքն ու եկամուտը, որն ունեցել է այս տարվա հուլիսի 1-ի դրությամբ: Մինչ այդ ՔԿՀ-ի պետը չէր համարվում հայտարարագիր ներկայացնող սուբյեկտ, սակայն «Հանրային ծառայության մասին» օրենքի փոփոխությունից հետո քրեակատարողական հիմնարկների ղեկավար կազմը ևս պետք է հայտարարագրի իր ունեցվածքը:

Ըստ ներկայացված հայտարարագրի՝ Տիգրան Նավասարդյանն ունի 8 միլիոն դրամը գերազանցող կամ դրան համարժեք արտարժույթից ավելի արժեք ունեցող ոսկյա զարդեր: Օրենքով սահմանափակված է և քաղաքացիներին հասանելի չէ այն տեղեկատվությունը, թե կոնկրետ քանի միլիոն դրամի կամ համարժեք արտարժութային արժեքի ոսկյա զարդեր ունի պաշտոնյան և ինչ ոսկա զարդեր են: 

«Արմավիր» ՔԿՀ-ի պետը հայտարարագրել է նաև 3 անշարժ գույք՝ 1 բնակարան և 2 հողամաս: 

Ունի նաև TOYOTA LAND CRUISER PRADO 2.7 L մակնիշի մարդատար ավտոմեքենա:

Քրեակատարողական հիմնարկի պետ Տիգրան Նավասարդյանի եկամուտը գոյացել է միայն աշխատավարձից, որը հուլիսի 1-ի դրությամբ կազմել է 1 միլիոն 926 հազար դրամ:

Ինչ վերաբերում է դրամական միջոցներին, ապա հայտարարագրել է 7 միլիոն 300 հազար դրամ, 5700 ԱՄՆ դոլար և 250 հազար ռուսական ռուբլի:

Նշենք, որ Տիգրան Նավասարդյանը մինչ այդ զբաղեցրել է նաև «Նուբարաշեն» և «Հրազդան» քրեակատարողական հիմնարկի պետի պաշտոնները: Նա քրեակատարողական համակարգում է մոտ երկու տասնյակ տարի: Նրա եղբայրն էլ՝ Արսեն Նավասարդյանը, զբաղեցնում է արդարադատության նախարարության Պրոբացիոն ծառայության պետի պաշտոնը:


Գլխավոր էջ



Այս թեմայով

... կարդացեք ավելին «Պաշտոնյաների ունեցվածքը» թեմայով
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ