«ՎիվաՍել-ՄՏՍ»-ի գլխավոր տնօրեն Ռալֆ Յիրիկյանին, բանաստեղծ Ռազմիկ Դավոյանին, կինոռեժիսոր Արտավազդ Փելեշյանին եւ հեռուստահաղորդավարուհի Նարա Շլեպչյանին մայրաքաղաքի 2799-րդ տարեդարձի առթիվ կշնորհվի Երեւանի պատվավոր քաղաքացու կոչում: 

Այս հարցը ներառված է Երեւանի ավագանու հոկտեմբերի 11-ի նիստում: 

Ռալֆ Յիրիկյանին կոչումը կշնորհվի տնտեսության զարգացման գործում ներդրած նշանակալի ավանդի եւ Երևան քաղաքում ակտիվ գործունեություն ծավալելու համար: 

Բանաստեղծ Ռազմիկ Դավոյանը կպարգեւատրվի հայ գրականության բնագավառում ներդրած նշանակալի ավանդի, ակնառու վաստակի եւ բազմամյա գործունեության համար: 

ՀՀ ժողովրդական արտիստ Արտավազդ Փելեշյանին պատվավոր կոչումը կշնորհվի կինոարվեստի զարգացման գործում ներդրած նշանակալի ավանդի, ակնառու վաստակի, երկարամյա եւ բեղմնավոր գործունեության համար: 

Իսկ ՀԽՍՀ ժողովրդական արտիստ Նարա Շլեպչյանին Երեւանի պատվավոր քաղաքացու կոչում կշնորհվի հայկական հեռուստատեսության բնագավառում ներդրած նշանակալի ավանդի, բազմամյա վաստակի և բեղմնավոր գործունեության համար: 

Երեւան համայնքը մայրաքաղաքի տոնի կապակցությամբ նաեւ բնակարաններ կնվիրի արվեստի երեք գործիչների՝ դերասան Ռուդոլֆ Ղեւոնդյանին, բալետի արտիստ Սեւակ Ավետիսյանին եւ երգիչ Ռուբեն Մաթեւոսյանին: 

Տարբեր հիմնավորումներ կան: Երեւանի Ալ.Սպենդիարյանի անվան օպերայի և բալետի ազգային ակադեմիական թատրոնի առաջատար մենապարող, Մովսես Խորենացի մեդալակիր, ՀՀ վաստակավոր արտիստ Սևակ Ավետիսյանը բնակվում է Նոր Նորքի 9-րդ զանգվածում՝ ծնողների, եղբոր ընտանիքի, քրոջ հետ համատեղ եւ հանդիսանում է բնակարանային պայմանների կարիքավոր։  

Ռուդոլֆ Ղեւոնդյանը բնակվում է Չեխովի փողոցի շենքերից մեկում, վարձակալական հիմունքներով: Նրա անվամբ Հայաստանի տարածքում որեւէ անշարժ գույք գրանցված չէ: 

ՀԽՍՀ ժողովրդական արտիստ, Երևան քաղաքի պատվավոր քաղաքացի, պատվո շքանշանակիր Ռուբեն Մաթևոսյանը բնակվում է կնոջ, որդու ընտանիքի, մյուս որդու եւ դստեր հետ, փոքր բնակարանում: Եվ Երեւանի քաղաքապետը որոշել է անվանի երգչին բնակարանային պայմանները բարելավելու հնարավորություն ընձեռել: