HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Քաղցրաշենում նվազել են խաղողի այգիների տարածքները

Արարատի մարզի Քաղցրաշեն գյուղի խաղողի այգիների տարածքը մեկ տարվա ընթացքում նվազել է 10 հեկտարով։ Եթե 2016թ. գյուղում կար 146,075 հա խաղողի այգի, ապա 2017թ.՝ 136,5 հա: Ընդ որում` նվազել են ֆիզիկական անձանց կողմից մշակվող խաղողի այգիների տարածքները:

Համայնքապետարանի տրամադրած տեղեկատվության համաձայն՝ 2010թ. Քաղցրաշեն գյուղի խաղողի այգիները կազմում էին 131,80 հա: Այդ տարածքն ամբողջությամբ պատկանում էր ֆիզիկական անձանց: Տարիների ընթացքում այգիների տարածքները մեծացան: Գյուղացիները ոգևորությամբ էին զբաղվում խաղողի մշակությամբ, քանի որ գինու եւ կոնյակի գործարանները մթերում էին գյուղացիների խաղողի բերքը, և իրացման դժվարություններ չէին առաջանում: 2015թ. Քաղցրաշենում կար 146,07 հա այգի, որից մոտ 2 հա-ը պատկանում էր իրավաբանական անձանց:

Քաղցրաշենի համայնքապետարանի գլխավոր մասնագետ Արտակ Եղիազարյանը այգիների տարածքների կրճատման մեջ արտառոց ոչինչ չի տեսնում: Ասում է, որ ժամանակ առ ժամանակ գյուղացիները հին այգին քանդում, նորն են հիմնում: Սակայն, իրականում պատճառն այլ է:

Քաղցրաշեն համայնքի բնակիչները հիմնականում զբաղվում են խաղողի մշակությամբ: Սակայն, գյուղացիները հիասթափվել են խաղողի մշակությունից` պատճառաբանելով, թե պետական աջակցություն չեն ստանում և բերքի իրացման ժամանակ մնում են միայնակ:

2015 թվականը «ճակատագրական» եղավ խաղողի մշակությամբ զբաղվող գյուղացիների համար: Մթերելով բերքը` գինեգործական ընկերությունները չկարողացան գյուղացիներին վճարել հասանելիք գումարը: 12 ընկերություններ պարտքեր էին կուտակել: Անցել է երկու տարի, սակայն պարտքն ամբողջությամբ մարված չէ:

Խաղողի մշակությամբ զբաղվող 58 քաղցրաշենցի «Վինար» ՍՊԸ-ից չի ստացել դեռևս 2015թ. հանձնած խաղողի գումարները: Ընկերությունը նրանց պարտք է ընդհանուր առմամբ՝ 12 մլն 326 հազար դրամ:

Այս ընկերությունը գյուղացիական տնտեսությունների ունեցած ամենամեծ պարտատերն է: Հունվարի 1-ի դրությամբ նրա պարտքը կազմում էր 81,2 մլն դրամ։ Ընկերությունը 2015 թվականին գյուղացիական տնտեսություններից մթերել է 284 մլն դրամ արժողությամբ 2983 տոննա խաղող:

Գյուղատնտեսության նախարարությունից «Հետք»-ին տեղեկացրին, որ «Վինար»-ն այս ամիսների ընթացքում մասնակիորեն մարել է պարտքերը. այսօր ընկերության ունեցած պարտքը կազմում է 30 մլն դրամ: Գյուղատնտեսության փոխնախարար Ռոբերտ Մակարյանի խոսքով՝ ընկերությունը քայլեր է ձեռնարկում նաև մնացած պարտքը մարելու ուղղությամբ. «Մասնավորապես՝ վաճառքի է հանվել ընկերության ունեցած սպիրտը»:

Քաղցրաշենի համայնքապետարանի աշխատակից Արտակ Եղիազարյանին ևս ընկերությունը պարտք է, սակայն վերջինս կարծես թե մոռացել է այդ պարտքի մասին: Հույս ունի, որ մի օր կմարեն: Այդպես են մտածում նաև մյուս գյուղացիները և հրաժարվում հարցազրույցից:

2016թ.-ին գյուղացիները բողոքի ակցիաներ կազմակերպեցին կառավարության շենքի դիմաց: Գյուղնախարար Իգնատի Առաքելյանն էլ խոստացավ, որ մինչև 2016թ. վերջը «Վինար» ընկերությունը կմարի կուտակած պարտքը: Անցել է մեկ տարի, սակայն ընկերությունը շարունակում է պարտք մնալ գյուղացիներին:

Խաղողի գնի անկման, ինչպես նաև` գյուղացիների բերքը չմթերելու պատճառներից մեկն էլ այն էր, որ գործարանները, որոնց սեփականատերերը պատգամավորներ, բարձրաստիճան այլ պաշտոնյաներ են, այս տարիների ընթացքում հիմնել են իրենց սեփական այգիները և շարքային գյուղացու խաղողի կարիքը կամ չունեն, կամ ունեն՝ քիչ քանակությամբ:

Օրինակ՝ ԱԺ պատգամավոր Արայիկ Գրիգորյանը «Ավշարի գինու գործարան» ՍՊԸ-ի 100% բաժնետերն է: Որպես ֆիզիկական անձ նա 24,87 հա խաղողի այգի ունի: Դրանք գտնվում են Արարատի մարզի Այգավան գյուղում: Խաղողի այգիներ ունի նաև գործարանը:

Արայիկ Գրիգորյանը նախորդ տարի 44 մլն 626 հազար դրամի եկամուտ է ստացել հենց իր՝ «Ավշարի գինու գործարան» ՍՊԸ-ին վաճառած գյուղատնտեսական մթերքներից:

Արարատի մարզում գինու գործարան ունի նաև նախկին վարչապետ Հովիկ Աբրահամյանը: Վարչապետն իր եկամուտների հայտարարագրերում չէր նշում, որ հող ունի, սակայն չգիտես ինչպես` ամեն տարի եկամուտ էր ստանում գյուղմթերքների իրացումից: Այսպես` 2011թ., երբ ԱԺ նախագահ էր, Հովիկ Աբրահամյանը 40 մլն դրամի եկամուտ է ստացել գյուղմթերքների իրացումից, 2012թ.-ին՝ 45 մլն դրամի, իսկ 2013թ.-ին՝ դարձյալ 40 մլն դրամի: Գրեթե նույնքան եկամուտ էլ գյուղմթերքների իրացումից ստանում էր վարչապետի կինը՝ Ջուլիետա Աբրահամյանը:

Միայն Նարեկ գյուղում Հովիկ Աբրահամյանի կնոջ՝ Ջուլիետա Աբրահամյանի անունով գրանցված է 120 հա հողատարածք, որից 100 հա-ը խաղողի այգի է, իսկ 20 հա-ը՝ խոտհարք:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter