HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Գրիշա Բալասանյան

Սևանա լճում սկուտերների ու մոտորանավակների նկատմամբ որևէ պետական մարմին հսկողություն չի իրականացնում

Գրիշա Բալասանյան

«Սևան ազգային պարկ»-ի տարածքը կազմում է 147,343 հա, որից ջրային տարածքը` շուրջ 127,800 հա: Այդ տարածքների մի մասը տրվել է վարձակալության: Բնապահպանության նախարարության տեղեկացմամբ՝ «Սևան ազգային պարկ» ՊՈԱԿ-ը 875 տնտեսվարողի հետ կնքել է հողի վարձակալության պայմանագիր, սակայն ՊՈԱԿ-ի կողմից հաշվառված չէ, թե վարձակալներից քանիսն են տարածքները որպես լողափ շահագործում: Միայն հայտնի է, որ 9 հանրային լողափ կա: Դրանցից 8-ը ստեղծվել է Հայաստանի կառավարության որոշումների հիման վրա, իսկ 1-ը՝ Մարտունու քաղաքապետարանի:

Հանրային լողափերի ընդհանուր մակերեսը կազմում է մոտ 30.0 հա: Դրանից 28.16 հա-ը կառավարության որոշումների համաձայն ստեղծված լողափերն են, իսկ 1.84 հեկտարը՝ Մարտունի համայնքին հարակից լողափը:

Լողափերի հաշվառված չլինելը անվտանգության և ափամերձ հատվածի մաքրության տեսանկյունից լուրջ հարցեր է առաջացնում: Դժվար է դրանց նկատմամբ հսկողություն սահմանելը, տարածքի աղբը հավաքելն ու անվտանգության նորմերը պահպանելը: Սակայն, նույնիսկ հայտնի հանրային լողափերում լողացողների անվտանգությունն ապահովված չէ:

Այս ամառ Ֆրանսիայից Սևան ժամանած զբոսաշրջիկ Իզաբել Մալեզը «Հետքի» հետ զրույցում ասում էր, որ Սևանն իրեն դուր է եկել, սակայն լողալու համար լիճ չմտավ, քանի որ վախենում էր սկուտերներից ու մոտորանավակներից: Նրա համար անհասկանալի էր, թե «ինչու են թույլ տալիս սկուտերներին ափին այդքան մոտ լինել»: Իզաբելի խոսքերով՝ Ֆրանսիայում շատ լուրջ են վերաբերվում հատկապես սկուտերների շահագործմանը, քանի որ դրանք կարող են մահացու լինել լողացողների համար:

Իզաբել Մալեզը նշում էր, որ Ֆրանսիայի լողափերում կան հատուկ առանձնացված գոտիներ սկուտերների, մոտորանավակների համար. «Դրանք բավականին հեռու են ափամերձ հատվածներից և լողացողների անվտանգությանը չեն սպառնում:

Թե´ բնապահպանության, թե´ արտակարգ իրավիճակների նախարարությունը հստակ չպարզաբանեցին, թե կառավարությունն ինչ նորմեր է սահմանել մոտորանավակների, սկուտերների շահագործման վերաբերյալ, եւ թե լճում լողացողներից ինչ հեռավորության վրա դրանք կարող են կայանել:

Հանգստի թեժ ամիսներին լողափերին սնկի պես ավելանում են շարժիչով լողամիջոցները: Որոշակի վճարի դիմաց ցանկացած ոք կարող է վարել սկուտեր, մոտորանավակ, և որևէ մեկը լիազորություն չունի պարզելու՝ արդյոք նա ունի՞ վարելու տարրական գիտելիքներ: Ականատես ենք եղել բազմաթիվ դեպքերի, երբսկուտերները մեծ արագությամբ չափից շատ մոտեցել են լողացողներին: Կամ վարողն է խույս տվել, կամ՝ լողացողները, և դժբախտ դեպքեր չեն գրանցվել:

Հսկողություն չկա նաև սկուտերների, մոտորանավակների սարքինության նկատմամբ: Մինչդեռ սկուտերը հանդարտ ջրի վրա զարգացնում է 80 կմ/ժ և ավել արագություն:

Բնապահպանության նախարարության աշխատակազմի ղեկավար Հովհաննես Հովհաննիսյանը տեղեկացրեց, որ «Սևան» ազգային պարկ» ՊՈԱԿ-ի լիազորությունների մեջ չի մտնում քաղաքացիների անվտանգության կազմակերպումը: Ավելին, ներկայում մոտորանավակների, սկուտերների կամ շարժիչով այլ ջրային փոխադրամիջոցների համար առանձնացված երթուղիներ նախատեսված չեն:

Իսկ արտակարգ իրավիճակների նախարարության աշխատակազմի ղեկավար Արմենուհի Գրիգորյանի փոխանցամբ՝ վերջին 5 տարիների ընթացքում Սևանա լճում մոտորանավակների, սկուտերների շահագործմամբ գրանցվել է 21 դեպք, որոնց հետևանքով եղել է 6 վիրավոր եւ 12 զոհ (որից 9-ը՝ ձկնորս), 26 քաղաքացու ցուցաբերվել է օգնություն՝ ջրից դուրս բելելու համար:

Ուշագրավն այն է, որ ԱԻՆ փրկարար ծառայության ստորաբաժանումները լողամիջոցների հաշվառման և շահագործման նկատմամբ հսկողություն իրականացնելու լիազորություններ չունեն: Նախարարության պաշտոնյան ասում է, որ փրկարար ծառայության հատուկ ջրափրկարար ջոկատը Սևանա լճում ամռան ամիսներին իրականացրել է 24-ժամյա հերթապահություն:

Իսկ հուլիսի 1-ից սկսած` Սևանա լճի 3 հանրային լողափերում, թերակղզում և դրանց ափամերձ ջրային հատվածում իրականացվել է 12-ժամյա հերթապահություն, որի ընթացքում փրկարարներն ափին, բարձրախոսների օգնությամբ քաղաքացիներին հիշեցնում են անվտանգության կանոնները:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter