Շվեյցարական իշխանությունները արգելափակել են Ռուսաստանի գյուղատնտեսության նախկին նախարար Ելենա Սկրիննիկի բանկային հաշիվները՝ կապված անօրինական ճանապարհով ձեռք բերված փողերի լվացման քրեական գործի նախաքննության հետ: Այս մասին Интерфакс-ին հայտնել է իրավիճակին տեղյակ իր անանուն աղբյուրը:

«Շվեյցարիայի դատախազության պահանջով՝ Սկրիննիկի 60 միլիոն շվեյցարական ֆրանկ կազմող հաշիվները արգելափակվել են»,- նշել է գործակալության աղբյուրը:

Նրա խոսքերով՝ ռուս նախկին նախարարը, ով հիմա ապրում է Ֆրանսիայի Լազուրի ափում, համարվում է շվեյցարացի քննիչների կողմից անցկացվող քրեական հետաքննության գործող անձանցից մեկը:

«Հետաքննության ժամանակ պարզվել է, որ 2007-2012 թվականներին շվեյցարական բանկերում Սկրիննիկի տարբեր հաշիվներին փոխանցվել է 140 մլն դոլար, որոնց ծագումը լուրջ կասկածներ է առաջացրել»,- ընդգծել է աղբյուրը:

Նա ասել է նաև, որ շվեյցարացի դատախազները և քննիչները համագործակցում են ռուս գործընկերների հետ, և մտադիր են գործը հասցնել դատարան:

Ավելի վաղ հայտնի էր դարձել, որ Ռուսաստանի Գլխավոր դատախազությունը հարցում էր ուղարկել Շվեյցարիա` Ռուսաստանի գյուղատնտեսության նախկին փոխնախարար Ալեքսեյ Բաժանովի՝ 12 մլն ֆրանկ կազմող հաշիվները արգելափակելու առնչությամբ:

Интерфакс-ի աղբյուրը նշել է, որ խոսքը, այսպես կոչված, «Ռոսագրոլիզինգի գործի»-ի մասին է: Դա պետական ընկերություն է, որը զբաղվում է Ռուսաստանի գյուղատնտեսական ոլորտի սպասարկմամբ: Մի խումբ բարձրաստիճան պաշտոնյաներ և գործարարներ մեղադրվում են «Ռոսագրոլիզինգ»-ից 1,125 մլրդ ռուբլի կազմող գումար գողանալու մեջ: 

«Ռոսագրոլիզինգը» 2001-2009 թվականներին ղեկավարել է հենց Ելենա Սկրիննկը, իսկ 2009 թվականին դարձել է Ռուսաստանի գյուղատնտեսության նախարար և աշխատել մինչև 2012 թվականը:

Լուսանկարը՝ ТАСС / Валерий Шарифулин